Policia: Kujdes në trafik, për 24 orë humbën jetën tre persona

​Policia e Kosovës duke iu referuar gjendjes së përgjithshme në trafikun rrugor ku gjatë 24 orëve të fundit në dy aksidente kanë humbur jetën tre persona, ka apeluar tek të gjithë qytetarët që të respektojnë dispozitat ligjore dhe rregullat e trafikut rrugor, të respektojnë shenjat e trafikut, kufizimet e shpejtësisë, t’u përshtaten kushteve të rrugës, si dhe të mos e përdorin telefonin gjatë vozitjes.

Policia i ka bëtë thirrje të gjithë drejtuesve të automjeteve që të jenë të kujdesshëm gjatë qarkullimit në rrugë, posaçërisht tani kur kanë filluar ndryshime atmosferike, reshje dhe shfaqje të mjegullave, gjatë natës dhe në orët e hershme të mëngjesit kur mund të paraqiten edhe ngrica të cilat vështirësojnë qarkullimin.

“Policia e Kosovës me njësitet e saj vazhdon të monitoroj dhe menaxhoj situatën në trafikun rrugor nëpër të gjitha rrugët e vendit dhe aty ku pjesëmarrësit bien ndesh me rregullat në trafik, masa ndëshkuese ligjore do të aplikohen me qëllim të parandalimit të rasteve të aksidenteve, në veçanti aksidenteve me fatalitet”, thuhet në komunikatën e Policisë. /Telegrafi/

Foto: Ilustrim