Ndotja e ajrit në Maqedoni në nivel alarmant, pesëfish mbi nivelin e lejuar (Video)

Rikthehet ndotja e ajrit. Shkupi, Tetova dhe Kumanova në 24 orët e fundit kanë qenë qytetet me ajrin më të ndotur edhe atë pesë fish mbi nivelin e lejuar. Ndërsa sot stacionet matëse të ajrit, tregojnë rezultate shqetësuese të ndotjes së ajrit në Kërçovë, Karposh dhe Qendër.

Ambientalistët thonë se ndotja e ajrit i ka gjetur autoritetet të papërgatitura, ndërsa OJQ-të kritikojnë institucionet kompetente se nuk kanë punuar mjaftueshëm për përmirësimin e gjendjes.

Ministri i Ekologjisë, Sadulla Duraku, tha për Alsat M se nesër do të publikohen masat kundër ndotjes së ajrit.

“Ne si ministri dhe Qeveri kemi krijuar grupin punues ku do tw dalim me masa ku do tw kemi një takim me kryetarwt e komunave të Shkupit dhe kryetarit të Shkupit dhe do t’i shpalosim, të gjitha masat nesër. Këto masa janë të kushtueshme për shtetin por ka disponim nga ana e Qeverisë së Maqedonisë dhe ministrisë së Ambientit Jetësor për mbrojtjen nga ajri i ndotur dhe masat se si të merren, të cilat masa janë të kushtueshme dhe duhet të parashihen në buxhetin e shtetit për të marr hapat se si duhet ta zvogëlojmë ndotjen e ajrit”, tha Sadulla Duraku.

Bashkia e Shkupit ndërkohë ka rekomanduar që qytetarët sa më pak të përdorin automjetet, të ndalohet djegia e mbeturinave ndërsa paralajmëruan edhe kontrolle të rrepta të inspektoratit për ekologji.