Hoti i thotë Abdixhikut: Ju as nuk i bëtë sigurimet shëndetësore e as pensionet për veteranët

Deputeti i Partisë Demokratike të Kosovës, Andin Hoti i ka reaguar deputetit Lumir Abdixhiku, i cili tha sot se janë hequr paratë për sigurimet shëndetësore për t’u siguruar paratë për pensionet e veteranëve të UCK-së.

Ai, përmes një statusi në “Facebook”, ka thënë se Abdixhikut me gjasë i pengon respekti për veteranët. Madje i ka thënë se “nëse nuk e din se çfarë kanë vuajtur ata në luftë, lë të shkojë në Drenicë, Dukagjin e Llap e të flasë me ish-ushtarët e Ushtrisë Çlirimtare të Kosovës”.

Statusi i plotë i Hotit:

Një deputet i Lidhjes Demokratike të Kosovës, Lumir Abdixhiku qenka krenuar sot që ka votuar kundër rishikimit të buxhetit të Kosovës, që parasheh ndarjen e pensioneve për veteranët.

Nuk më çuditë kjo krenari e këtij manipulanti të vogël të Lidhjes që gjithë karrierën e tij e ka ndërtuar duke zhvatur fonde me shefin e tij Isa Mustafa, i cili ka qenë bllokuesi kryesor i zbatimit të ligjit për sigurimet shëndetësore.

Lexo po ashtu LDK votoi kundër buxhetit, varfërohet shëndetësia, pasurohen militantët

Abdixhiku, nëse nuk ka dëgjuar për luftën e Ushtrisë Çlrimitare, nëse nuk e kupton peshën historike, nëse nuk e kupton dhembjen dhe respektin që e kërkojnë dhe meritojnë veteranët, lë të ndajë pak kohë e të shkojë në Drenicë, në Dukagjin, Anamoravë ose në Llap. E nëse irritohet t’i takojë luftëtarët e lirisë, të paktën lë të shfletojë pak në internet dhe e kupton drejtë.

Sa i përket buxhetit për sigurimet shëndetësore, Lumiri nuk duhet ta harrojë se qe nja 3 vjet Lidhja Demokratike e Kosovës e ka pasur nën udhëheqje Ministrinë e Financave dhe Ministrinë e Shendetësisë.

Ka qenë vetë kryetari i tij, shefi i tij, idoli i tij, Isa Mustafa, që e ka zvarritur këtë çështje.

Para se të bëjë propagandë e të na shesë moral në Facebook, Lumiri le të pyesë në LDK se pse nuk e kanë siguruar buxhetin për sigurime shëndetësore, por edhe pse i lanë anash veteranët.

Nëse për Lumirin vuajtjet e ish-ushtarëve të UÇK-së, gjymtyrët e plagosura të invalidëve të luftës, janë asgjë, atëherë çdo deklaratë e tij, gjoja për të mirën e këtij vendi, është veç një tentim për ta manipuluar dhe përçarë popullin.