Haradinaj: Nuk jemi të pashpresë për liberalizimin 

Kryeministri i Kosovës, Ramush Haradinaj, ka thënë se nuk mendon se kosovarët janë të pashpresë rreth liberalizimit të vizave.

“Unë nuk mendoj që jemi të pashpresë në liberalizim”, tha Haradinaj i pyetur nga KALLXO.com rreth deklaratës së presidentit Hashim Thaçi se marrja e shtetësisë shqiptare aktualisht është shpresa e vetme e kosovarëve për të lëvizur lirshëm në Evropë.

Rreth çështjes së nënshtetësisë shqiptare, kryeministri Haradinaj tha se nuk është kundër.

“Unë e kam marrë për vete. Nuk kam apliku, por herën e kalume më kanë thanë që dojnë me ma dhanë”, theksoi ai.

Haradinaj theksoi se Qeveria është duke e kryer punën e vet dhe se nuk është duke humbur kohë.

Ndryshe, në një takim me homologun shqiptar, Ilir Meta, presidenti Hashim Thaçi tha sot se nuk pret që Kuvendi i Kosovës të miratojë në një të ardhme të afërt marrëveshjen e demarkacionit me Malin e Zi, që është kusht nga Bashkimi Evropian për liberalizimin e vizave.

Prandaj, ai kërkoi nga homologu i tij shqiptar, Ilir Meta, që t’i pajisë shtetasit e Kosovës me shtetësi shqiptare si rrugë që kosovarët të dalin nga ajo që ai e quajti “izolim klasik”. /Kallxo.com/