Donald Trump, së shpejti i vetëm në Shtëpinë e Bardhë!?

Që pas deklarimeve të diskutueshme të Donald Trump-it lidhur me ngjarjet në Charlottesville janë shtuar dorëheqjet në shenjë proteste. Edhe mbështetësit besnikë si Stephen Bannon i lanë lamtumirën Shtëpisë së Bardhë.

“Është mungesa e qëndrueshmërisë së presidentit të SHBA-ve, që tregon se ky influencohet nga mendimi i atyre që e rrethojnë”, thotë kryetari i Qendrës Christian Cultural Centers, A.R. Bernard, lidhur me dorëheqjen e tij nga këshilli evangjelikan i Donald Trumpit.

“Unë do të preferoja të isha në radhë të parë i krishterë. Por, Amerika ka krijuar një mjedis, që më detyron, të jem në radhë të parë një zezak, që jeton në Amerikë”, thotë Bernard.

Drejtuesi i kishës me këtë nënkupton ngurrimin e Trumpit për t’iu kundërvënë forcimit të dhunës së djathtë në SHBA dhe për ta dënuar atë me fjalë të qarta.

Bernard nuk është i vetmi që largohet nga forumi i konsulencës në shenjë proteste ndaj deklaratave relativizuese të Trumpit në sfondin e ekseseve të dhunës së djathtë në Charlottesville. Javën e kaluar , presidentit të SHBA-ve iu desh të shpërbëjë dy forume me shefa koncernesh për shkak të shumë dorëheqjeve. Kësisoj ai hoqi dorë nga plani për themelimin e një forumi konsulence për infrastrukturën. Të premten u vetëshpërbë edhe komisioni për artin dhe shkencat shoqërore.

Trump gjithnjë e më shumë po mbetet vetëm, edhe sepse shumë nga të besuarit e tij po hasin edhe vetë në kritika. Investitori Carl Icahn, miliarder dhe mbështetës qysh në fillim i Trumpit, u tërhoq për të mos e rënduar presidencën e tij. Biznesmeni Icahn vazhdimisht kritikohej se me këshillat e tij ndaj qeverisë, ai mund të influencojë në favor të bizneseve të veta.Forumet e konsulencës së Trump-it po zvogëlohen gjithnjë e më shumë.

E, së fundi u largua nga Shtëpia e Bardhë edhe Stephen Bannon, i cili konsiderohej si presidenti në prapaskenë dhe një përfaqësues i flaktë i politikës nacionaliste ekonomike të presidentit. Bannon, ndonëse donte të vazhdonte “edhe më tej luftën për Trump”, ai deklaroi, në një intervistë për portalin e lajmeve “The Weekly Standard”, se: “Presidenca Trump, për të cilën ne luftuam dhe ia dolëm, ka marrë fund.” Forcat e moderuara në Kongres kësisoj do të fitojnë peshë. /DW/