Zgjedhjet lokale në Maqedoni do të mbahen më 15 tetor, ndërsa fushata zgjedhore fillon më 25 shtator

Fushata për zgjedhjet lokale të caktuara më 15 tetor, fillon më 25 shtator, përcjell Telegrafi Maqedoni.

Komisioni Shtetëror i Zgjedhjeve sot në mbledhje e miratoi afatin për zgjedhjet lokale për anëtarët e këshillave komunale dhe të Bashkisë së Shkupit, kryetarëve të komunave dhe të kryeqytetit.

Inspektimi publik në listën zgjedhore fillon më 21 gusht dhe do të vazhdojë deri më 9 shtator. Afati i fundit për mbledhjen e nënshkrimeve për listat e kandidatëve të pavarur për këshilltarë dhe kryetarë është prej 21 gushtit deri më 4 shtator. Partitë politike listat e tyre të kandidatëve duhet t’i dorëzojnë jo më vonë se 9 shtator.

Në seancë u miratua edhe kërkesa e Ministrisë së Brendshme dhe deri te Ministria për Informatikë dhe Shoqëri për dorëzimin e të dhënave të cilat janë të nevojshme për të krijuar listat e zgjedhësve, si dhe mbushjen e përbërjes së organeve zgjedhore.

Zgjedhjet lokale do të mbahen më 15 tetor dhe raundi i dytë do të mbahet më 29 tetor.

Kryparlamentari, Talat Xhaferi, dje në mesditë nënshkroi vendimin për shpalljen e zgjedhjeve lokale. /Telegrafi/