Kryetarja e Kushtetueses flet për rregullat kushtetuese “në funksion të krijimit të institucioneve”

Kryetarja e Gjykatës Kushtetuese, Arta Rama-Hajrizi, ka thënë se “rregullat kushtetuese nuk mund të shërbejnë si pretekst për të krijuar pengesa”. Këto komente ajo i bëri me rastin e shënimit të 4 Korrikut – Ditës së shpalljes së Pavarësisë së SHBA-ve.

Duke përkujtuar se sot po festojmë në shtetin më të ri të Evropës, i cili e fitoi lirinë dhe pavarësinë me sakrificën e vet, Hajrizi-Rama theksoi se SHBA-të janë rezultat i përpjekjeve të vazhdueshme të popullit amerikan për ta bërë shoqërinë demokratike më të mirë për të gjithë.

Për më tepër, ajo u shpreh se “është në përgjegjësi e gjeneratave të ardhshme të Kosovës për të vazhduar punën drejt shtetndërtimit, gjë e cila më së miri bëhet përmes përforcimit të sundimit të ligjit, ku askush nuk është mbi ligjin dhe të gjithë pa përjashtim janë nën kontrollin e tij”.

Rama-Hajrizi ka theksuar se Kosova sot është para një testi të demokracisë për krijimin e institucioneve të dala nga zgjedhjet e 11 qershorit.

“Rregullat kushtetuese duhet të interpretohen në funksion të krijimit të institucioneve. Rregullat kushtetuese nuk mund të shërbejnë si pretekst për të krijuar pengesa në procesin e krijimit të institucioneve kushtetuese që kanë dalë nga zgjedhjet. Tejkalimi i suksesshëm i këtij testi do të jetë indikator shtesë për qëndrueshmërinë e demokracisë sonë dhe indikator shtesë për përkushtimin e të gjitha institucioneve të Kosovës për forcimin e sundimit të ligjit. Vetëm përmes këtij të fundit të fundit e ardhmja e Kosovës do të premtojë mirëqenie për qytetarët e saj”, ka thënë Rama-Hajrizi.

Ajo është zotuar se mbrojtja e të drejtave dhe lirive themelore të qytetarëve do të jetë misioni i saj kryesor si kryetare e Gjykatës Kushtetuese dhe mision i secilit gjyqtar vendor dhe ndërkombëtar që janë pjesë e kësaj gjykate. /KosovaPress/