Molliqaj: Beteja do të jetë mes Vetëvendosjes e “koalicionit të krimit”

Sekretari Organizativ i Lëvizjes Vetëvendosje, Dardan Molliqaj ka thënë se beteja për zgjedhjet e 11 qershorit do të jetë mes partisë ku ai bën pjesë dhe koalicionit PDK, AAK dhe Nisma, të cilin ai e quan ‘koalicion i krimit’.

Molliqaj, përmes një postimi në Facebook, ka thënë se “mijëra votues të LDK-së dhe AKR-së po na bashkohen për shkak se e kanë kuptuar që vetëm ne jemi subjekti i cili e ka shansin për t’i mposhtur ata që e shkatërruan shtetin tonë”.

Postimi i plotë i Molliqajt:

“Organizata vendore dhe ndërkombëtare tashmë kanë konstatuar se beteja kësaj here do të zhvillohet në mes të Lëvizjes sonë dhe koalicionit të krimit PDK-AAK.

Këtë po e vërejmë edhe nëpër tubime e takime çdo ditë në terren, ku mijëra votues të LDK-së dhe AKR-së po na bashkohen për shkak se e kanë kuptuar që vetëm ne jemi subjekti i cili e ka shansin për t’i mposhtur ata që e shkatërruan shtetin tonë.

Ju ftoj të gjithë juve që në këto 12 ditët e ardhshme të angazhoheni me tërë kapacitetet tuaja në mënyrë që fitorja jonë të jetë sa më e madhe.

Shihemi ditëve të ardhshme në aktivitetet tona gjithandej Kosovës”, ka shkruar Molliqaj. /Telegrafi/