Banka Botërore: Ekonomia e Shqipërisë shënoi ngritje prej 3.2%

Banka Botërore në raportin e fundit “Tregtia në Tranzicion”, evidenton se ekonomia e shtetit shqiptar ka shënuar rritje 3.2 për qind në vitin 2016, mbështetur nga kërkesa e brendshme e fuqishme.

Investimet private në dy projekte të mëdha të energjisë të financuara nga kapitali i huaj – gazsjellësi Trans-Adriatik dhe një hidrocentral – dhe një rimëkëmbje në konsumin privat e nxitën këtë rritje.

Rritja e konsumit privat u nxit nga përmirësimet në punësim dhe lehtësimi i kushteve të kredisë. Eksportet neto kontribuuan pozitivisht në rritje, të mbështetura nga shërbimet e turizmit, që u zgjeruan me 25.4 për qind, thuhet në raport.

Sipas BB, ecuria ekonomike e Shqipërisë pritet të përmirësohet në periudhën afatmesme. Rritja parashikohet në 3.5 për qind gjatë 2017-18 dhe pritet të rritet më tej në 3.8 për qind në 2019.

Ndërsa ekonomia vazhdon të përshpejtohet dhe tregjet e punës përmirësohen, priten përfitime të mëtejshme në uljen e varfërisë, thuhet në raport. /Telegrafi/