Qela pas takimit me Delawie: Arbitrazhi ndërkombëtar, zgjidhja më e mirë për demarkacionin

Deputeti i Lëvizjes për Bashk, Raif Qela, ka shkruar në llogarinë e tij në Facebook për takimin me ambasadorin amerikan Greg Delawie, të cilit ia ka paraqitur qëndrimin e Lëvizjes për Bashkim rreth çështjes së demarkacionit.

Qela ka thënë se sikur të kishte transparencë dhe gatishmëri për konsensus çështja e demarkacionit tashmë do të kishte përfunduar, dhe se sipas tij zgjidhja më adekuate për këtë çështje do të ishte arbitrazhi ndërkombëtar.

Postimi i plotë në Facebook:

“Sapo e përfunduam një takim me ShT Ambasadorin e SHBA-ve në Kosovë, z.Greg Delavie. Qëndrimi i z. Ambasador ishte shumë korrekt. Z.Ambasador e tregoi qëndrimin zyrtar të SHBA-ve lidhur me procesin e demarkacionit me Malin e Zi dhe me rëndësinë që ka për Kosovën përfundimi i këtij procesi.

Duke e falënderuar Ambasadorin Delavie për gjithë angazhimin e tij dhe të SHBA-ve që ky problem të zgjidhet, unë ia paraqita atij qëndrimin e Lëvizjes për Bashkim se po të kishte pasur transparencë që nga fillimi dhe po të kishte pasur gatishmëri për konsensus, kjo çështje tashmë do të ishte e përfunduar. Po ashtu, unë e njoftova atë për qëndrimin tonë, të cilin e kemi shprehur që nga fillimi, se zgjidhja më e mirë në situatën e krijuar lidhur me demarkacionin me Malin e Zi do të ishte arbitrazhi ndërkombëtar”, ka shkruar Qela. /Telegrafi/