Pacolli: Kosovarët të vetëdijesohen për të konsumuar prodhime vendore

Presidenti i AKR-së Behgjet Pacolli, të martën gjatë një vizite që i bëri fabrikës “Konson” në Gjilan, premtoi se nëse partia që ai drejton do të udhëheqë me qeverisjen e ardhshme, atëherë do të krijohen kushte që prodhimet vendore të jenë të privilegjuara.

Duke përkujtuar thënien se puna mban njeriun, kreu i AKR-së është shprehur i kënaqur me punën që po bëhet në këtë fabrikë.

“Pashë një kulturë të prodhimit, pastërti dhe disiplinë. Do të doja shumë që kosovarët të vetëdijesohen të konsumojnë prodhime vendore dhe ky është një prodhim, pulat e “Konsonit” janë sinonim i prodhimit vendor. Do të dëshiroja shumë që në takimin e ardhshëm të kem informata më të mira që kosovarët më tepër të konsumojnë prodhime vendore”, tha Pacolli.

Nga ana e tij, menaxheri i fabrikës “Konsoni” në Gjilan, Agim Sahiti tha se Behgjet Pacolli vjen nga bota e biznesit dhe e njeh këtë lëmi shumë mirë.

“Problemet të cilat ia shpalos ky më lehtë i pranon, pasi që i di në përgjithësi problemet e prodhuesve dhe bizneseve”, u shpreh ai.