Liridon Latifi, djaloshi i artë i Skënderbeut që me golat e tij po e kërkon Evropën (Foto/Video)

Sa herë që ai shënon Skënderbeu merr pothuajse gjithmonë tre pikët ose i shkon shumë afër fitores. Ky është Liridon Latifi, apo djaloshi i artë i Skënderbeut.   

Shtatë gola edhe pse është kuota më e lartë për të që kur është bërë pjesë e korçarëve nuk janë shumë për një futbollist me cilësitë e tij, por nëse Skënderbeu është ende në vallen e titullit, një meritë të padiskutueshme e ka pikërisht ai.

Liridon Latifi është njeriu të momentit te Skënderbeu, por jo vetëm kaq, sepse ai është një nga talentet më të mëdhenj të këtyre viteve të fundit në kampionatin shqiptar dhe njeriu që ka ndoshta vlerën më të lartë në treg nga futbollistët e Superiores, në këtë aspekt mund ta rivalizojë ndoshta vetëm Ekuban.

Me 7 gola të realizuar, por edhe shumë asiste ky është sezoni më i mirë i Liridon Latifit që nga momenti që është bërë pjesë e korçarëve.

Goli i fundit ndaj Flamurtarit i dha 3 pikë shumë të çmuara skuadrës së Dajës me Skënderbeun që falë atij goli ka ende shanse për të mbrojtur titullin kampion.

Është vetëm 23-vjeç pak javë më parë bëri debutimin e tij me kombëtaren shqiptare, transmeton SS.

Në drejtim të Latifit pati shumë oferta që verën e kaluar, por ai zgjodhi të vazhdojë aventurën e tij me korçarët edhe për të paktën një tjetër sezon me shpresën se mund të fitojë një tjetër titull por edhe Kupën e Shqipërisë, trofe të cilin Skënderbeu nuk e ka fituar asnjëherë.

Liriidon Latifi deri më tani me golat e tij i ka dhënë Skënderbeut plot 16 pikë në këtë sezon.

Sulmuesi prishtinas këtë verë pritet të jetë një nga emrat më të nxehtë pasi për të shumë klube kanë trokitur në derën e Skënderbeut.