Alkimia e Ballkanit, Kosova (5): Shteti shumetnik me 90 për qind shqiptarë! (Video)

Episodi i pestë për Kosovën nga seria Alkimia e Ballkanit – me gazetarin e njohur kroat Goran Milliq, për Al Jazeera Balkans – nis me dy vendbanime të kroatëve, Janjeva dhe Letnica.

Dy kisha të madhe katolike tregojnë se këtu dikur kishte mijëra besimtarë. Në Janjevë thuhet se ishin 5,000 e në Letnicë 500. Sot në Janjevë janë 200 e në Letnicë 32 kroatë. Në këto fshatra jetojnë kryesisht pleqtë me pension prej 70 eurove, që janë të dëshpëruar dhe të zhgënjyer.

Prifti Marjan Lorenci është shqiptar i shkolluar në Kroaci që mban meshën në gjuhën shqipe dhe kroate, sepse në këto vende janë shpërngulur shumë katolikë shqiptarë.

Lexo po ashtu Alkimia e Ballkanit (episodet 1, 2, 3 dhe 4): Kosova, vendi që çdo ditë ndryshon (Video)

Nga ky dëshpërim Milliqi kalon në zonën moderne të Prishtinës, në Qendrën për Inovacion që mbështet krijimin e start-up-ëve dhe që fal tyre mbi 2,000 të rinj punojnë në biznese të mira e moderne.

Kosova është shtet qytetar dhe në të janë pothuajse 90 për qind shqiptarë. Sipas Kushtetutës ky nuk është shtet i shqiptarëve po i qytetarëve të saj.

Në këtë episod flet edhe presidenti Hashim Thaçi që thotë se ka dështuar ideja e shteteve etnike në Ballkan. Ndërsa, flet edhe deputeti i Lëvizjes Vetëvendosje, Fisnik Ismaili, që tregon për rreziqet e asaj që ai e quan “bosnjakëzimi i Kosovës” dhe funksionari komunist Azem Vllasi të cilit gazetari Milliq ia kujton sakrificat e shumta të shqiptarëve. Vllasi thotë se është shpaguar kjo, sidomos në ruajtjen e identitetit të Kosovës. /Telegrafi/