Pas avarisë, flet drejtori i Spitalit të Vushtrrisë

Më 6 dhjetor 2016 në mënyrë solemne ishte bërë përurimi i renovimit të Spitalit të Përgjithshëm “Sheikh Zayed” në Vushtrri, ku të pranishëm kishin qenë donatori nga Emiratet e Bashkuara Arabe dhe kryeministri i Kosovës, Isa Mustafa. Mirëpo brenda dy muajsh sot ishte hera e dytë që shkaktohet avari të mëdha në spitalin e Vushtrrisë, shkaku i punimeve jocilësore.

Sot në mëngjes në repartin e kirurgjisë të këtij spitali ka rënë tavani, gjë që ka shkaktuar rrëmujë të madhe në korridor, por fatmirësisht nuk ka pasur persona të lënduar.

Lexo po ashtu Shembet tavani në spitalin “Sheik Zajed” të Vushtrrisë (Foto)

Veriu.info ka kontaktuar me drejtorin e spitalit, Hajrullah Saraçi, i cili ka thënë se zyrtarët e spitalit nuk kanë marrë pjesë në pranimin teknik pas përfundimit të renovimit, gjë të cilin sipas tij e ka donatori nga Emiratet e Bashkuara Arabe.

“Ajo rregullohet brenda gjysmë ore. Kush të ka thanë bre ty që rrezikohen pacientët, a po më dëgjon mua si drejtor apo i dëgjon thashethemet e hallkut. Ato janë paleta, e ka lëshu një tel kanë ra, nuk është kurrfarë katastrofe ajo, hajdeni për një orë e verifikoni qysh është. Nuk është problemi jonë pranimi teknik, sepse e kanë bërë ata Emirateve të Bashkuara Arabe, mirë e keq ata e kanë bërë vet. Na nuk kemi bërë kurrfarë pranimi teknik, ata e kanë bërë pranimin teknik. Janë disa defekte, por spitali është në garancion deri më 30 maj dhe i rinovojnë prapë, nuk janë defekte të mëdha këto. Nuk bënë tana të zezat me i thanë për donatorin, kur ai ka investu shtatë milionë euro. Nëse kanë keqpërdorë, i kanë keqpërdorë ata të Emirateve, sepse ata e kanë bërë pranimin teknik. Shqiptarët nuk kanë mundur ta keqpërdorin. Këtë po ta japi qartë, ju çka të njollosni për punime të këqija, i njollosni direkt ata, na nuk kem pas kurrfarë qasje në pranim teknik”, ka thënë për Veriu.info drejtori Saraçi.

Kujtojmë se në javën e dytë të muajit janar, kishte pasur një avari të ngjashme në Spitalin e Vushtrrisë për të cilën alarmin e kishte ngritur komuna e Vushtrrisë.

“Vetëm një fat i madh sot ka shpëtuar personelin e QKMF-së, e cila në kuadër të këtij spitali kryen shërbimet e emergjencës. Pas rënies së plafonit, kanë pëlcitur gypat e ngrohjes, është shkaktuar një kontakt edhe me rrjetin elektrik, për çka është dashur të intervenojë Njësia e Zjarrfikësve,” kishte thënë komuna e Vushtrrisë përmes një njoftimi.