ATK në aksion, mbyllen 15 lokale të lojërave të fatit (Foto)

Drejtoria e Lojërave të Fatit në Administratën Tatimore të Kosovës, ka zhvilluar sot aksion tek subjektet të cilat ushtrojnë veprimtari të lojërave të fatit.

“Nga aksioni i cili ka nisur nga ora 11:00 në qytetin e Prishtinës dhe të Fushë Kosovës, janë evidentuar disa parregullsi të cilat nuk janë në përputhshmëri me ligjin për lojërat e fatit.

Sipas informacioneve që kemi pranuar deri me tani nga tereni, janë mbyllur 15 lokale, prej tyre 4 bastore dhe 8 lokale të automateve. Ndërsa, janë konfiskuar 3 shtëpiza të garave me qen dhe 4 automate të pa licencuara. Vlera e gjobave të shqiptuara për parregullsi e gjetura deri më tani është 25, 000 euro”, thuhet në njoftimin për media.

Përveç shkeljeve të lartpërmendura, ekipi i inspektorëve bënë të ditur se të gjitha këto lokale janë mbyllur, për arsyeje se nuk e plotësojnë kriterin e distancës prej 500 metra vij ajrore me institucionet arsimore, kulturore dhe fetare.

Ky aksion i cili është mbështetur nga Policia e Kosovës dhe Dogana, do të vazhdoj gjatë ditëve në vijim edhe në qytete tjera të Kosovës.

Administrate Tatimore e Kosovës i bën thirrje të gjitha bizneseve që ushtrojnë veprimtarin e lojërave të fatit të respektojnë ligjin, pasi që në të kundërtën do të merren masat konform dispozitave ligjore.

ATK, në mënyrë që të jetë edhe më e suksesshme në zbatim e ligjit, mbetet e hapur për bashkëpunim me qytetarët dhe institucionet tjera të zbatimit të ligjit. Për këtë qëllim ftojmë qytetarët që të gjitha informatat e korrupsionit në lidhje me ATK-në dhe evazionin fiskal, t’i paraqesin në linjën pa pagesë 0800-80-800./Telegrafi/