Sejdiu: Astriti për 68 ditë në paraburgim nuk u intervistua asnjëherë

Nënkryetari i Lëvizjes Vetëvendosje, Dardan Sejdiu ka thënë se vdekja e Astrit Deharit është e tmerrshme dhe është e shkaktuar nga shteti.

Sipas Sejdiut, Dehari nuk ishte intervistuar për ato 68 ditë sa ishte në paraburgim dhe ishte arrestuar në mënyrë të padrejtë.

“E kanë mbajtur 68 ditë dhe asnjë herë nuk është intervistuar për rastin që ka bërë. Dhe pas këtyre ditëve vdes Astrit Dehari”, tha Sejdiu në emisionin “Politikë” të Tribuna Channel.

Sejdiu shtoi se përgjegjësinë për këtë vdekje e ka shteti dhe për këto 10 ditë nuk ka asnjë përgjigjësi për këtë që ka ndodhë.

“Në një vend normal për këtë që i ka ndodhur Astritit do të shkarkoheshin por ky kryeministër dhe kjo Qeveri dojn t’i marrin privilegjet e pushtetit”, shtoi Sejdiu.

Nënkryetari i LVV-së tha se Astriti ka qenë një prej aktivistëve më të mirë që kanë pasur dhe mjaft aktiv, i dijshëm e poashtu edhe i formuar shumë politikisht.

“Astriti ka qenë aktiv gjatë fushatës poashtu edhe në drejtorinë e Shëndetit Publik. Ata e morën aktivistin më të mirë në institucion të sigurisë dhe na e kthyen të vdekur”, tha Sejdiu.