Xhaferi: Po nuk i ngacmuam institucionet ata nuk bëjnë asgjë

Pas suksesit të arritur në lidhje me presionin e bërë për pezullimin e punës së kombinatit ”Jugohrom” Telegrafi Maqedoni ka biseduar me Arianit Xhaferin nga Lëvizja ‘Eco Guerilla’ rreth hapave që kjo organizatë do të merr dhe për organizimin e protestave të ardhshme në lidhje me çështje tjera ku duhet presioni i sektorit jo-qeveritarë për të lëvizuar gjërat deri në zgjidhje.

Në pyetjen ”A besoni se ”Jugohrom” do të ri-fillojë punën pas zgjedhjeve?”, Xhaferi për Telegrafi Maqedoni thotë: ”Ministria e Mjedisit premtoi që ”Jugohrom” nuk do hapej pa vendosur filtra. Sado që një gjë të tillë duam ta besojmë, përvojat e mehërshme na shërbejnë si mësim që nuk guxojmë të jemi euforik, dhe për më tepër nuk mund të besojme në vendime të këtilla, aq më pak në periudhën parazgjedhore. Na ngelet të jemi syhapur.” u shpreh Xhaferi.

Për hapat e ardhshëm të kësaj lëvizje, Xhaferi thotë: ”Eco Guerilla” ka akoma shumë punë për të bërë. Tetova tash 15 vjet ka një deponi në hyrje të qytetit, qyteti nuk ka transport publik, hapësirat e gjelbërta sa vijnë e zhduken, ndërtimet vend e pavend e pa kriter, mungesa e hapësirave për parkim veturash, etj. Gjitha këto kërkojne vëmendje dhe qasje më serioze, ndërkohë që autoritetet janë dëshmuar se nuk dinë të funksionojnë po s’u ngacmuan nga jashtë, po s’patën presion…” u shpreh Xhaferi në mes tjerash.

Në lidhje me ”përçarjet” e brendshme në Eco Guerilla dhe për fitoren në çështjen ”Jugohrom”, Xhaferi thotë:”Mbyllja e Jugohromit na ka dhënë një impuls më tepër, na ka dhënë vullnet se këmbëngulja jonë dhe mbështetja e madhe nga qytetarët që na besuan jep rezultate nëse përdoret në formën e duhur. Ne tash kemi mësuar shumë dhe ato praktika që funksionojnë do i përdorim për të punuar dhe në çeshtje tjera.” përfundoi Xhaferi./Telegrafi/