Krasniqi ankohet për koalicionin qeverisës te Nataliya Apostolova

Kryetari i Këshillit Kombëtar të Nismës për Kosovën, Jakup Krasniqi ka deklaruar se derisa ky koalicion qeverisës mendon se vota e deputetëve opozitar është e pa nevojshme, me arsyen se ata kanë vota të mjaftueshme, kjo gjë është e shqetësuese dhe i bie që në Kosovë nuk ka opozitë fare.

Këto komente ai i ka bërë gjatë takimit me shefen e Zyres së BE-së në Kosovë, Nataliya Apostolova, ku ka theksuar se në atë vend ku nuk bashkëpunohet me opozitën, aty vetëm demokraci nuk ka.

Shefja e Zyres së BE-së/PPBE në Kosovë, Nataliya Apostolova, gjatë këtij takimi me kryetarin e Këshillit Kombëtar, ka thënë se Bashkimi Europian është i përkushtuar maksimalisht për të mbështetur perspektivën europiane të Kosovës.

“Duhet të punojmë së bashku në avansimin e agjendës së BE-së për Kosovën, në çështjet si zbatimi i MSA-së, liberalizimin e vizave, dhe vazhdimin e dialogut për normalizimin e marrëdhënieve mes Prishtinës e Beogradit. Kuvendi dhe opozita kanë një rol të fuqishëm dhe korrektues në këto procese”, ka thënë Apostolova.

Gjatë këtij takimi, kryetari i Këshillit Kombëtar, Jakup Krasniqi, ka folur edhe për çështjen e liberalizimit të vizave, për të cilën tha se liberalizimin e vizave e meritojnë qytetarët e Kosovës.