Mbërrin në Shqipëri trupi i pajetë i Erjon Toros, viktimë e tërmetit në Itali

Në mesin e 290 viktimave të regjistruara nga tërmeti tragjik në Italinë Qendrore është edhe Erjon Toro.

Trupi i pajetë i viktimës ka mbërritur mëngjesin e kësaj të diele në Shqipëri. Trageti i linjës Bari-Vlorë u ankorua në port rreth orës 08:30 minuta. Ai u nis nga porti i Brindizit mbrëmjen e ditës së shtunë.

Trupi i emigrantit u prit nga familjarët dhe miqtë e tij, ndërsa shpenzimet për kthimin në atdhe janë mbuluar nga qeveria shqiptare.

Pëllumb Toro, xhaxhai i emigrantit 33-vjeçar Erjon Toro, ka falënderuar autoritetet shtetërore për sjelljen e trupit të tij në Shqipëri. Ai tha se ky është lehtësim për familjen e Erjonit, të cilët u përballën me dhimbjen e madhe të humbjes së djalit të vetëm.

“Do them vet dy fjalë për të falënderuar autoritetet. Falënderojmë shtetin shqiptar që na lehtësoi dhimbjen.

Procedurat falë ambasadës dhe shtetit italian na lehtësuan dhimbjen. Kjo për ne ështe dhimbja e dytë dhe dhimbja na u lehtësua”, u shpreh Pëllumb Toro.

Emigranti nga fshati Kurjan i Fierit jetonte prej disa vitesh në Amatrice në Itali. Gruaja dhe dy vajzat e mitura të Toros arritën të dilnin nga banesa, ndërsa trupi i Erjonit ngeli mes rrënojave.

Erjon Toro ka emigruar në Itali që në moshën 18 vjeçare dhe që në fillim u vendos në qytezën Amatrice. Vitet e fundit ai punonte në ndërtim dhe njihej në zonë si një djalë i qetë dhe i respektueshëm. Erioni ishte djali i vetëm i familjes Toro. Ai kishte tre motra, dy prej të cilave emigrantë në Greqi, ndërsa prindërit e moshuar jetojnë vetëm në Fier.

Pas kërkesave të familjarëve për kthimin sa më parë të trupit të pajetë të djalit të tyre në Shqipëri, për ta përcjellë atë për në banesën e fundit qeveria shqiptare u zotua se do të mbulonte shpenzimet e kthimit të trupit të 33-vjeçarit në Shqipëri.