Besa befason kampionin, Drenica fiton me lehtësi ndaj Lirisë

Besa e Pejës e ka befasuar kampionin në fuqi të Superligës së Kosovës, Feronikelin, në shtëpi të tyre, duke e mposhtur me rezultat 2:1, teksa Drenica ka fituar në shtëpi ndaj Lirisë me rezultat 2:0.

Skuadra pejane ka shënuar një fitore të rëndësishme në kuadër të xhiros së parë në udhëtim te kampioni i Kosovës, Feronikeli.

Ishte ish-mesfushori i Feronikelit, Xhevdet Shabani, ai i cili i ka dënuar me dy gola të bukur kampionët e udhëhequr nga Afrim Tovorlani.

Shabani shënoi golin e barazimit në minutën e 65-të, teksa golin e epërisë dhe fitores në minutën e 76-të.

Golin e vetëm për skuadrën nga Drenasi e realizoi, Behar Maliqi nga penalltia, në minutën e 59-të.

Ndërsa, Në Skenderaj, Drenica mposhti 2:0 Lirinë, falë dy golave të sulmuesit të tyre kryesor, Granit Arifaj, ku të parin e shënoi me gërshërë në minutën e 18-të, teksa golin tjëtër dy minuta më fund.

Vlen të theksohet se Liria kishte mundësi të ngushtonte epërsinë, por humbi një penallti në minutën e 74-të me anë të Blendi Memajt. /Telegrafi/