Ushqyerja e vonuar me gji rrit rrezikun e vdekjeve të të sapolindurve

Rreth 77 milionë të sapolindur kudo në botë, ose 1 në 2 – nuk ushqehen me gji brenda orës së parë të lindjes, duke iu mohuar atyre lëndën ushqyese bazë, antitrupat dhe kontaktin e lëkurës me nënën e tyre që i mbrojnë ata nga sëmundjet dhe vdekja, deklaron UNICEF.

“T’i bësh fëmijët të presin për shumë kohë për kontaktin e parë jetik me nënën e tyre jashtë embrionit ul shanset e të sapolindurit për të mbijetuar, kufizon ushqyerjen me qumësht dhe pakëson shanset e ushqyerjes vetëm me gji,” tha France Bégin, Këshilltar i Lartë i UNICEF për Ushqimin.

“Nëse të gjitha foshnjat nuk ushqehen me asgjë tjetër përveçse me qumësht gjiri që nga momenti që ata lindin dhe deri sa bëhen gjashtë muajsh, mbi 800,000 jetë do të shpëtoheshin çdo vit.”

Progresi i ushqyerjes me gji i sa më shumë të sapolindurve brenda orës së parë të jetës ka qenë i ngadaltë gjatë 15 viteve të fundit, tregojnë të dhënat e UNICEF. Sa më shumë të vonohet ushqyerja me gji, aq më i madh është rreziku i vdekjes në muajin e parë të lindjes.

Vonesa e ushqyerjes me gji me 2-23 orë pas lindjes rrit rrezikun e vdekjes gjatë 28 ditëve të para të jetës me 40 për qind. Vonesa me 24 orë ose më shumë rrit rrezikun deri në 80 për qind.

“Qumështi i gjirit është vaksina e parë e fëmijës, mbrojtja e parë dhe më e mirë që ata kanë kundër sëmundjes dhe infeksioneve,” tha France Bégin. “Duke pasur parasysh llogaritjet e të sapolindurve që përbëjnë rreth gjysmën e të gjitha vdekjeve të fëmijëve nën moshën pesë vjeçare, ushqyerja e hershme me gji mund të bëjë ndrzshimin ndërmjet jetës dhe vdekjes.”

Analizat e UNICEF tregojnë se gratë nuk po marrin ndihmën që ato kanë nevojë për të filluar ushqyerjen me gji menjëherë pas lindjes, madje edhe kur një mjek, infermiere apo mami asiston në procesin e lindjes.

Ushqyerja e foshnjave me lëngje ose ushqimetë tjera është një tjetër arsye që e vonon ushqyerjen e hershme me gji. Kur foshnjave u jepen alternativa më pak ushqyese sesa qumështi i gjirit, ata ushqehen më rrallë me gji, duke e bërë edhe më të vështirë për nënat që të fillojnë dhe vazhdojnë ushqyerjen me gji.

Në shkallë globale, vetëm 43 për qind e foshnjave nën gjashtë muaj ushqehen plotësisht me gji. Foshnjat që nuk ushqehen fare me gji kanë 14herë më shumë gjasa që të vdesin sesa ata që ushqehen vetëm me gji. /Telegrafi/