Një infermier dyshohet se ka vrarë 10 pacientë të tij

Një infermier në Gjermani e cili u dënua me burgim të përjetshëm për vrasjen e dy pacientëve, dyshohet se ka shkaktuar vdekjen e dhjetëra të tjerëve duke iu injektuar doza të mëdha të medikamentit për sëmundjet e zemrës.

Në këtë konkluzion kanë arritur hetuesit në Gjermani, të cilët kërkuan ekzaminimin e trupave të 99 personave që kanë vdekur gjatë periudhës kur infermieri shërbente në klinikë, dhe në 27 prej tyre janë gjetur gjurmë të mëdha të medikamentit për sëmundjet e zemrës, ka raportuar revista e lajmeve në Gjermani “Der Spiegel” .

Infermieri i cili njihet vetëm me emrin Niels H, u dënua me burgim të përjetshëm në muajin shkurt duke u shpallur fajtor për vrasjen e dy personave.

Ngjarjet kanë ndodhur nga viti 2003 deri në 2005-ën dhe prokurorët po hetojnë rreth 200 vdekje jo vetëm në Oldenburg ku ai punonte, por edhe në zonën e Vilhelmshaven.

Nëse konfirmohen edhe vrasjet e tjera, atëherë ky do të ishte rasti më i rëndë i një vrasësi serial në Gjermani që pas përfundimit të luftës së dytë botërore.

Niels pasi deklaroi se i kish kryer krimet thjesht nga monotonia kërkoi falje dhe u shpreh se shpresonte që familjet e viktimave të gjenin paqe.