Bamieh fiton një pjesë të rastit ndaj EULEX-it (Video)

Ish-prokuroja e EULEX-it, Maria Bamieh, e cila kishte bërë publike shumë shkelje brenda misionit evropian, e ka fituar betejën e parë ndaj EULEX-it.

Me të nisur rasti, EULEX-i kishte bërë kërkesë në Tribunal që të ketë gjykim të mbyllur, që nënkupton se mediet nuk do të mund të raportonin për rastin në asnjë fazë, raporton KTV.

Por, gjykata e ka hedhur poshtë këtë kërkesë.

“Pohimet e zonjës Bamhie mund të jenë të mira ose të këqija, kjo nuk është relevante. Ato përfshijnë akuza për sjellje të pahijshme. Publiku ka interes të dijë për këto akuza”, shkruan në aktgjykimin që e ka siguruar KTV-ja.

Kështu, bazuar në këtë vendim, Tribunali i Punës e ka detyruar EULEX-in që t’i paguajë Bahmies shpenzimet e kësaj pjese të gjykimit, në vlerë prej 10 mijë e 500 funte – plus TVSH.

EULEX-i ende nuk e ka paguar këtë shumë derisa vlera e interesit për të është 8 për qind ose 840 funte.

Misioni evropian për sundim të ligjit, nuk ka qenë në gjendje të komentojë për rastin.

KTV-ja ka mësuar se brenda pak javësh pritet të merret vendimi nëse Maria Bamhie ka të drejtë të padisë Zyrën e Punëve të Jashtme dhe EULEX-in.