Qytetarët i gëzohen hapjes së Pishinës së Gërmisë

Ndryshe prej vitit të kaluar kur qytetarëve të Prishtinës iu deshtë të presin deri në korrik që të hapet pishina e Gërmisë, këtë vit pishina e Gërmisë bëri hapjen një muaj më herët.

Në orët e paradites së sotme, dhjetëra qytetarë me padurim e priten hapjen e pishinës së Gërmisë, drejtuesit e së cilës kanë bërë të gjitha përgatitjet në mënyrë që vizitorët të jenë të kënaqur.

Fleta Cakolli, njëra nga vizitorët që vizituan pishinën për t’u freskuar, i tha KosovaPressit, se i gëzohet faktit që është hapur pishina, pasi kanë pas nevojë për të dhe se veç tjerash pishina ka edhe pamje të bukur.

“Kam ardhur në Pishinën e Gërmisë sepse më pëlqen shumë, ka një pamje të bukur, si dhe është shumë bukur këtu të shohësh se si lahen. Mirë për neve që është hap pishina e Gërmisë sepse njerëzit kanë pas shumë nevojë për freski”, tha Cakolli.

Edhe 16 vjeçari, Shëndrit Gashi, ka treguar se në kohën e verës freskinë e gjenë tek Pishina e Gërmisë.

“Kam ardhur në pishinë, pasi që është edhe hapja e pishinës, vi shpesh, vizitoj edhe pishina tjera, por këtu vi më shpesh… Mirë është. Uji pak i ftohtë, por në përgjithësi mirë”, tha ai.

Drejtori i Pishinës së Gërmisë, Nexhat Uka, në hapjen e sotme të pishinës, tha se i kanë bërë të gjitha përgatitjet, dhe se për vizitorët ka ofruar edhe aktivitet të ndryshme sportive, në mënyrë që të plotësohen ato çfarë kërkojnë vizitorët.

“Sot është hapja e Prishtinës së Gërmisë, i kemi bërë të gjitha përgatitjet për këtë sezon verore. Kemi të gjithë stafin duke përfshirë shpëtimtarët, stafin teknik, ambulanten, policinë si roje dhe thuajse i kemi bërë të gjitha përgatitjet për këtë sezon…ka aktivitete sportive të ndryshme, varet tash edhe prej klientëve se çfarë dëshirojnë. Në përgjithësi kushtet janë tënjëjta, çmimet i kemi të”, tha Uka.

Shpëtimtari Ngaip Kalludra për KosovaPress tha se puna e shpëtimtarit është punë me përgjegjësi, pasi që në pyetje është jeta e njeriut. Ai shtoi se duhet kujdes dhe vëmendje gjatë gjithë kohës, sidomos kur bëhet fjalë për pjesën e fëmijëve.

“Në fillim është zonë e fëmijëve, ku është pak më thellë dhe kemi më shpesh intervenime. Mundohemi me mbajt rend, me iu ndihmu. Kjo është punë shumë e përgjegjësi se është në pyetje jeta e njeriut. Minutat janë shumë të mëdhenj nëse nuk je i koncentruar tërë kohën në ujë, është moment që për një minutë të humb fëmija dhe për këtë duhet që gjatë tërë kohës të jesh i koncentruar në vendin e punës. Nuk besoj që ka pishinë më të mirë në Kosovë”, është shprehur Kalludra.

Në pishinë gjithashtu ishin vendosur edhe kioskat, e që punëtorët e tyre presin që gjatë kësaj sezone të shkojë gjithçka mirë.

Ndryshe, Pishina e Gërmisë do të mbikëqyret nga ndërmarrja komunale NPK “Sportmarketing” Prishtinë. /Telegrafi/