Franca garanton: Do të ketë siguri të plotë gjatë zhvillimit të Euro 2016

Jo vetëm Franca ka garantuar siguri të plotë për zhvillimin e Kampionatit Europian, por së fundmi edhe autoritetet belge janë shprehur se vendi është 100% i sigurt për këtë event që do të presë më shumë se 2.5 milionë vizitorë.

Në një konferencë për shtyp, shefi i policisë belge deklaroi se gjithë këtë kohë ata kanë qenë në bashkëpunim të plotë me autoritetet franceze dhe se këto të fundit, tha ai, i kanë marrë të gjitha masat për t’i paraprirë ndonjë sulmi të mundshëm.

Por deklarata e Departamentit amerikan të Shtetit se në Europë ka rrezik për shkak të terrorizmit është pritur me skepticizëm nga vendet e bllokut.

Kreu anti-terrorit në Itali, Lamberto Giannini tha se situata kërkon vigjilencë maksimale, por nuk ka vend për alarm pasi nuk ka kërcënime apo paralajmërime specifike.

E së njëjtës linje ishte dhe Ministria e Jashtme britanike, e cila në një deklaratë tha se shqetësimi ekziston, por nuk ka bazë konkrete për të paralajmëruar qytetarët që të mos shkojnë në Francë.

Franca nuk do të jetë vetëm në kampionatin e futbollit Euro 2016. Forcave vendase të sigurisë do t’i bashkohen patrulla ndërkombëtare.

Së fundmi, me propozimin e Ministrisë së Brendshme franceze, edhe policia ruse konfirmoi pjesëmarrjen në operacionin e sigurisë në vend. Përpos forcave policore, Rusia do të dërgojë edhe ekspertë të shërbimeve të inteligjencës.