Veseli: Kanë të drejtë të na kritikojnë, s’po punojmë sa duhet

Kryetari i Kuvendit të Kosovës, Kadri Veseli, tha sot se kanë të drejtë të gjithë ata që e kritikojnë Kuvendin e Kosovës për punë joefikase.

Sipas tij, ky institucion nuk po e bënë punën siç duhet, sidomos vitin e fundit.

“Kush na kritikon veçanërisht në këtë vitin e fundit të mandatit tonë ka të drejtë. Nuk jemi duke punuar aq sa duhet. Ajo çka dua të them është se do të punojmë edhe në mënyrë më intensifikuese, veçanërisht pas liberalizimit të vizave dhe MSA-së, ne duhet t’i japim një perspektivë në Kuvendin e Republikës së Kosovës dhe në të gjitha institucionet e zhvillimit ekonomik. Po presim që shumë shpejt të finalizojmë dhe një projeksion, veçanërisht programor, në kuadër të politikave qeverisëse së bashku me partnerin e koalicionit, në mënyrën që etapa e re, e cila i ka dhënë një mundësi shumë të madhe Kosovës edhe në perspektiven e zhvillimit ekonomik të jetësohet nga institucionet e republikës së Kosovës. Këtu ka të bëjë me Kuvendin e Kosovës dhe Qeverinë, qytetarët presin veçanërisht në fushën e zhvillimit ekonomik, më shumë nga ne”, tha Veseli.

Ndryshe, monitorues të punës së Kuvendit kanë kritikuar institucionin në fjalë, për punë jo efikase.