Mustafa, qytetarëve: Bashkohuni në aksionin për pastrimin e Kosovës

Kryeministri i Kosovës, Isa Mustafa, përmes një postimi në rrjetin social ‘Facebook’ u ka bërë thirrje qytetarëve që t’i bashkohen aksionit për largimin e deponive në 30 komuna të Kosovës, të organizuar nga Iniciativa “Ta Pastrojmë Kosovën”.

Në postimin e tij, Mustafa ka shkruar se duhet mbajtur ambientin e pastër, në mënyrë që të krijohen kushte më të mira për fëmijët dhe të krijohet një imazh më i mirë për vendin.

Ja postimi i plotë i Mustafës në Facebook:

Të dashur miq,

Sot do të zhvillohet aksioni për largimin e mbeturinave dhe deponive në 30 komuna të Kosovës, i organizuar nga Iniciativa “Ta Pastrojmë Kosovën”.

Ftoj qytetarët që t’i bashkohen këtij aksioni, por edhe që gjatë çdo dite të vitit të japim së bashku kontributin tonë për të pastruar ambientin e jetës.

Duke mbajtur ambientin tonë të pastër, krijojmë kushte për jetë më të mirë për fëmijët tanë, rrisim kualitetin e jetës së njerëzve dhe krijojmë një imazh të mirë për vendin.

Të kujdesemi së bashku për Kosovën tonë të bukur!