Sigal Prishtina kampion (Foto/Video)

Sigal Prishtina është shpallur kampion i Kosovës në basketboll për sezonin 2015/2016, pas fitores ndaj Pejës (65-70) në sfidën e fundit finale të ‘play-offit’.

Fillim më i mirë i skuadrës kryeqytetase në çerekun e parë, mirëpo në fund të dhjetëminutëshit të parë diferenca ishte vetëm dy pikë (14:16).

Ekipi mysafir luajti sërish më mirë edhe pjesëlojën e dytë duke shkuar në pushim me nëntë pikë epërsi (30:39).

Pejanët u rikthyen fuqishëm në çerekun e tretë për ta ngushtuar diferencën dhe madje e barazuan rezultatin duke e mbyllur këtë pjesëlojë me rezultat 52:52.

Dhe nuk ka dyshim që rrjedha e çerekut të fundit ishte plot dramë dhe emocione. Ndërsa në fund të lumtur dolën lojtarët e Sigal Prishtinës, të cilët u shpallën kampionë falë triumfit me pesë pikë epërsi.

Nga ora 19:30, Palestra e Sporteve “Karagaçi” në Pejë, ishte arena e duelit ndërmjet dy skuadrave më të fuqishme në Kosovë dhe natyrisht se atmosfera ishte tejet e nxehtë.

Kjo ishte përballja e pestë e finaleve të ‘play-offit’, e cila vendosi titullin e kampionit për këtë edicion. Dy rivalët e përbetuar në këtë ndeshje hyjnë me nga dy fitore dhe Sigal Prishtina regjistroi fitoren e tretë dhe në këtë mënyrë iu gëzua titullit të kampionit.

Theksojmë se kampioni i ri do të jetë pjesë e kualifikimeve në Ligën e Kampionëve të Evropës, format ky që pritet të startojë në edicionin 2016/2017.

Ky është titulli i tretë radhazi i Prishtinës dhe i 12-ti në tërësi. Njëherësh, skuadra kryeqytetase këtë sezon i ka fituar të gjitha garat ku ka marrë pjesë. Krahas Superligës, Sigal Prishtina triumfoi edhe në Kupë dhe në Ligën Ballkanike. /Telegrafi/