Muhaxheri: Shkarkova dy drejtorë përgjegjës, për koalicion shohim e flasim

Gazmend Muhaxheri, Kryetar i komunës së Pejës dhe kryetar i LDK-së në këtë komunë, ka folur sot për herë të parë pas lëkundjes dhe problemit në koalcionin LDK-PDK në Pejë.

Muhaxheri në emisionin ‘Alo Mirëmëngjesi’ të Radio Dukagjinit, ka thënë se ka shkarkuar dy drejtorë të PDK-së, sipas tij, përgjgjës për mos kalimin e ndryshimeve (ridestinimin e buxhetit) përderisa për vazhdim të bashkëqeverisjes me PDK-në në Pejë. ai tha se mbetet që të diskutohet dhe shihet ditëve në vazhdim.

“Partneri është aty për të mbështetur zhvillimin e politikave. Dje PDK pa asnjë paralajmërim nuk e ka votu ridestinimin e disa mjeteve dhe unë kam shkarkuar dy drejtorë, përgjegjës për këtë veprim”, deklaroi Muhaxheri për Radio Dukagjinin.

I pyetur rreth vazhdimit ose prishjes së koalicionit me PDK-në në Pejë, Muhaxheri ka deklaruar se kjo çështje mbetet të diskutohet ditëve në vazhdim.

“Mbetet të bisedohet ditëve të vijim dhe të shihet për veprimet e mëtutjeshme. Do të takohemi ditëve në vijim. Këto janë çështje që ndodhin, nuk është fundi i Botës. Vazhdojmë, shohim”, është përgjigjur Muhaxheri, transmeton Telegrafi.

Sa i përket zhvillimeve të djeshme në Këshillin e përgjthshëm të LDK-së në tha të mos ketë dëgjuar asgjë. “Nuk kam asnjë koment. Nuk kam dëgjuar asgjë. Jam marrë me obligime tjera”, deklaroi Muhaxheri.

Ndryshe dje, në cilësinë e Kryetarit të Komunës, Gazmend Muhaxheri ka shkarkuar nga detyra dy drejtorë komunalë të PDK-së, Ukë Selimajn- drejtor për Punë komunale dhe Salih Lajçin- drejtor i Urbanizmit.

PDK në Pejë në bazë të marrëveshjes për bashkëqeverisje në këtë komunë, udhëheq me katër drejtori, dy të sipërpërmendurat dhe dy të tjera, për Zhvillim Ekonomik, që udhëhiqet nga Artan Gashi dhe atë për Mbrojtje dhe Shpëtim që drejtohet nga Muhamet Mahmutaj.

Pritet të shihet tani se si do të veprojë dega e PDK-së në Pejë, meqë edhe shkarkimi i dy drejtorëve të saj nga ana e Muhaxherit ka ndodhur pa asnjë paralajmërim tek kreu i degës së PDK-së, Xhavit Haliti.

Xhavit Haliti-Kryetar i PDK-së në Pejë, duke reaguar ndaj veprimit të Gazmend Muhaxherit, dje u tha mediave se nuk do të rrijnë me ‘zor’ në koalicion.

“Nëse doni prishje të koalicionit, nuk u rrimë me zor”,kishte thënë Haliti. /Telegrafi/