Kosova vëzhgon zgjedhjet në Republikën Domenikane

Një delegacion i Komisionit Qendror të Zgjedhjeve të Kosovës, në përbërje të anëtarëve Betim Gjoshi e Adnan Rrustemi, po qëndrojnë në Republikën Domenikane për të vëzhguar zgjedhjet në këtë shtet që do të mbahen ditën e diele (15 maj).

Siç njofton komunikata, delegacioni i KQZ-së si pjesë e Misionit Vëzhgues Zgjedhor (MVZ) i formuar nga disa vende anëtarë të Asociacionit të Trupave Zgjedhore Botërore (A-WEB), pjesë e së cilit është edhe KQZ e Republikës së Kosovës, kanë zhvilluar takimet të ndryshme si dhe kanë parë nga afër përgatitjet para ditës së zgjedhjeve.

Para ditës së zgjedhjeve, anëtarët e KQZ-së së bashku edhe me vëzhguesit tjerë nga vende të ndryshme të botës, janë pritur në takim nga presidenti i Republikës Domenikane, Danilo Medina Sanchez, ndërsa më vonë kanë zhvilluar takime të ndara me kandidatët presidencialë.

Gjatë ditës së zgjedhjeve, Misioni Vëzhgues Zgjedhor do të përcjellin nga afër procesin e votimit në disa Qendra Votimi; mbylljen e votimit; numërimin e votave; dhe shpalljen e rezultateve të zgjedhjeve.

Zgjedhjet e ditës së diele të organizuara nga Bordi Qendror i Zgjedhjeve janë të shumëfishta pasi do të zgjidhet presidenti dhe zëvendësresidenti; senatorët dhe deputetët e Kongresit Kombëtar; kryetarët e kuvendeve dhe drejtorët e distrikteve komunale dhe deputetët që do të përfaqësojnë komunitetin domenikan që jeton jashtë vendit.