Prapaskenat e transferimit të Neymar te Barcelona

Presidenti i Barcelonës, Josep Maria Bartomeu, thotë se është i qetë në lidhje me zgjidhjen e çështjes “Neymar”.

Në një intervistë të gjatë me “Globoesporte”, kreu i klubit katalanas hedh dritë edhe mbi detajet e transferimit të yllit brazilian nga Santosi. Sikurse dihet, Barcelona është duke u hetuar në Spanjë për shkak të shumave të transferimit të Neymar në vitin 2013. Sipas presidentit, Barça ka ndjekur gjithnjë këshillat dhe rregullat tatimore, ndërsa problemi ekziston vetëm për hir të leximit dhe interpretimeve, që mund të lindin nga kontratat.

Bartomeu siguron se nuk ka gabime në “rekrutimin” e tij te Barcelona, ndaj nuk beson se do të jetë i vështirë rinovimi me Neymar, kontrata aktuale e të cilit skadon në mesin e vitit 2018. Versioni që jep presidenti i Barcelonës është që negociatat filluan në vitin 2011 dhe është rënë dakord me Santosin, por në minutën e fundit, klubi brazilian hoqi dorë, sepse besonte se do të bënte më shumë para, me marketing, duke e mbajtur lojtarin deri në fund të kontratës. Dhe, me lejen e klubit, Barça ka negociuar direkt me babain e Neymar (partner i N & N Consulting &N Esportiva e Empresarial) pagesën prej 40 milionë € për të siguruar transferimin e tij pas Kupës së Botës, kur sulmuesi ishte i lirë.

Pra, katalanasit thuhet të kenë paguar një total prej 57.1 milionë € për nënshkrimin e Neymar: 40 millionë €, për të cilat tashmë ishte rënë dakord me babain e sulmuesit, dhe mbi 17.1 milion €, për t’ia paguar Santosit për marrjen e lojtarit në fjalë para mesit të vitit 2014, kur i mbaronte kontrata. Por, grupi DIS, i cili mbante 40% të të drejtave të futbollistit, ka mosmarrëveshje në gjykatë për shumën. Pretendohet se është “maskuar” shuma aktuale, për të ulur transferimin nga kompania DIS, e cila mori rreth 6,8 milionë €. Kjo gjë nënkupton ankesa kundër Neymar në Brazil dhe Spanjë. Bartomeu tha se po bisedohet me babanë e Neymar për rinovimin e kontratës.