Ymeri, për demarkacionin: Ndërkombëtarët punuan politikisht, për t’i sjellë stabilitet Qeverisë

Lideri i Lëvizjes Vetëvendosje, Visar Ymeri, i është bashkuar karvanit të reagimeve ndaj rezultatit të paraqitur nga ekspertët e Komisionit ad-hoc Ndërkombëtar për demarkacionin me Malin e Zi.

“Si opozitë e bashkuar për muaj me radhë kemi kundërshtuar marrëveshjen për demarkacion. Argumenteve tona iu bashkuan specialistë vendorë e njerëz të fushës e të profesionit.

Argumenteve tona iu bashkëngjitën dhjetëra mijëra në protesta.

Kur thanë se po formojnë një grup për vlerësimin e demarkacionit, ne thamë se nuk do ta pranojmë, pasi nuk përfshinë në të asnjë specialist lokal. Nuk publikuan fare fushëveprimin e këtij grupi. Madje edhe ndërkombëtarët e përfshirë, nuk ishin specialistë.

Ky grup punoi politikisht për t’i sjellë stabilitet qeverisë së Kosovës.

Por, në këto kushte, stabiliteti i qeverisë është e kundërta e stabilitetit të shoqërisë sonë.

Përfundimet proqeveritare të komisionit ishin të pritura dhe të parashikuara në qëndrimin e përbashkët të opozitës.

Ne kishim të drejtë, prandaj do të vazhdojmë me protestat.

Demarkacioni në këtë mënyrë është i papranueshëm dhe kriminal ndaj Kosovës”, ka shkruar ai në Facebook.