Limaj: Ambasadat e Kosovës po shpifin për opozitën

Fatmir Limaj në emisionin “Rubikon” të KTV-së ka thënë se shteteve të huaja po u thuhet çdo gjë e keqe për opozitën.

“Ambasadat po flasin çdo gjë të keqe për opozitë. Nuk ka ambasadë që shpif më shumë për opozitën”, ka thënë Limaj, transmeton Koha.net.

Ai ka thënë se ndërkombëtarëve u është prezantuar skenari i protestave të 17 shkurtit, që sipas atyre që Limaj i ka quajtur “inteligjenca e Kosovës”, skenar që ka pasur edhe parashikim të vrasjeve.

Limaj ka thënë se opozita nuk duhet të qëndrojë më Kuvendin e Kosovës, sepse nuk ka kuptim më.

“Gjëja e parë është largimi nga Parlamenti. Opozita duhet të tregojë se se në parlament ky regjim nuk e dëgjon opozitën, sikur nuk e ka dëgjuar popullin në protesta”, ka thënë Limaj.

Ai ka folur edhe për deputetët që e kanë ndërruar mendimin gjatë votimit të Thaçit për president, por edhe për Gjykatën Speciale.

Limaj ka thënë se nuk është standard dhe se nuk është normale që për 15 minuta të ndërrohet mendimi për votim.

Kryetari i Nismës për Kosovë ka folur për vendimet e Gjykatës Kushtetuese, për të cilat ka thënë se kanë qenë shumë kontroverse.

Sipas Limajt, disa vendime kanë qenë kontroverse dhe se kanë krijuar situata në vend, duke përmendur rastin e ish-presidentit Pacolli, që sipas tij është më kontroversi.

Ai gjithashtu ka thënë se Kushtetuesja është bërë organ vendimmarrës politik.

“Gjykata Kushtetuese u bë vendimmarrës politik, është futur në kompetencat e institucioneve”, ka thënë Limaj.