Edita Tahiri u nderua me titullin “Simbol i qëndresës” nga qyteti i Durrësit

Me ftesë të kryetares së Shoqatës “Gruaja e kohës dhe ekonomisë” dhe kryetarit të komunës së Durrësit, Vangjel Dako, ministrja për Dialog Edita Tahiri qëndroi dje në Durrës ku mori pjesë në aktivitetin “Gruaja, simbol i qëndresës” në të cilën u promovuan gra të suksesshme të qytetit të Durrësit nga fusha të ndryshme si dhe dy personalitete nga Kosova, Edita Tahiri dhe Flora Brovina.

Në praninë e personaliteteve të njohura të qytetit të Durrësit, ministrja Edita Tahiri e cila ishte e ftuara speciale e këtij aktiviteti u nderua me titullin “Simbol i qëndresës” nga qyteti i Durrësit.

Prefekti Roland Xhelili ia dorëzoi mirënjohjen ministres Tahiri duke theksuar se kjo është një mirënjohje për veprimtarinë e saj shumëvjeçare në shërbim të çështjes kombëtare dhe si një grua e shquar shqiptare atdhetare, politikane, diplomate dhe intelektuale. Ai vlerësoi lartë angazhimin e ministres Tahiri në proceset politike dhe diplomatike në shërbim të shqiptarëve dhe pavarësimit të Kosovës.

Në fjalën e saj ministrja Edita Tahiri falënderoi kryetaren Myzejen Konduri dhe kryetarin e komunës së Durrësit për këtë mirënjohje, duke theksuar se ajo ndihet jashtëzakonisht e nderuar nga qyteti i Durrësit dhe qytetarët e saj, ndërsa tha që ky titull “Simbol i qëndresës” sublimon të gjithë veprimtarinë e saj për çlirimin dhe pavarësimin Kosovës dhe shqiptarëve.

“Të punosh në shërbim të kombit dhe të atdheut është një punë me plotë frymëzim, por edhe me shumë sakrifica, mirëpo ndjenja që po ndihmoja popullin tim për të realizuar ëndrrën e lirisë  e pavarësisë më ka dhënë forcën e duhur gjatë këtyre njëzetë e gjashtë vjetëve”, tha ministrja Tahiri.

Ajo pastaj foli edhe për origjinën e saj familjare, duke thënë: “Për nga nëna jam e Shqipërisë dhe për nga babai jam e Kosovës, por gjithnjë po me pengon që jemi një komb me katër-pesë atdhe. Duhet të bashkohemi, të kemi një komb dhe një atdhe dhe të mos lejojmë që padrejtësia ndaj kombit tonë të përcaktoj ardhmërinë tonë. Kosova dhe Shqipëria janë dy shtete euroatlantike dhe kombi shqiptar tradicionalisht është një komb properëndimor. Tani na duhet të forcojmë kombin duke forcuar shtetet tona në pikëpamje ligjore dhe ekonomike. Ndërsa vizioni im është që fuqizimi i kombit dhe fuqizimi i grave duhet të shkojnë bashkë, sepse gratë me fuqinë e tyre do të jenë një forcë e rëndësishme për zhvillim dhe prosperitet, theksoi ministrja Tahiri.

Në fjalën e saj, ideatorja dhe organizatorja e kësaj ngjarje shkrimtarja e njohur Myzejen Konduri, theksoi se gruaja është një mrekulli, e cila dhuron vetëm dashuri.

Arsyeja e përzgjedhjes së këtyre 10 grave të nderuara që kanë kontribuuar për qytetin e Durrësit, nuk është vetëm profesionalizmi i arrirë në fushën ku ato punojnë prej vitesh me pasion e dashuri, por dhe përkushtimi i tyre në familje, si nëna e si bashkëshorte. Ajo tha se znj. Edita Tahiri është një simbol qëndrese për gjithë kombin shqiptar dhe jo vetëm për gratë, duke shtuar se profili i saj i lartë politik, diplomatik dhe akademik e ka vënë atë në majat e grave të suksesshme.

Në këtë manifestim, me titull “Simbol i qëndresës” u nderua edhe deputetja Flora Brovina për veprimtarinë e saj shumëvjeçare në shërbim të çështjes kombëtare dhe humanitare. /Telegrafi/