Po vjen filmi “Frozen 2”

Vazhdimi i filmit të animuar “Frozen” është konfirmuar sot zyrtarisht nga kompania Disney.

Drejtori ekzekutiv i kompanisë Disney, Bob Iger, gjatë takimit me aksionarët, i cili është mbajtur sot, ka njoftuar se bashkë-regjisorët Chris Buck dhe Jennifer Lee do të marrin pjesë në vazhdimin e këtij filmi të animuar.

Është konfirmuar se Josh Gad do të luajë në rolin e dordolecit Olaf, por ende nuk dihet data e lansimit.

Konfirmimi i Disneyt për vazhdimin e filmit vjen vetëm tre ditë pasi Buck dhe Lee mohuan zërat se janë duke punuar në një projekt të tillë.

“Ne ishim shumë të lodhur”, ka thënë Lee, transmeton Koha.net. “Ne me të vërtetë nuk dimë se si është të ndalësh një minutë dhe të mendosh për atë se çfarë duam të bëjmë”.

Personazhet nga “Frozen” së pari do të kthehen në një muzikël “Frozen Broadway” dhe në një film të shkurtër “Frozen Fever”, i cili do të shfaqet në kinematë para filmit të animuar “Cinderella” (Hirushja).

Aktorët si Kristen Bell, Idina Menzel dhe Jonathan Groff, të gjithë do ta përsërisin rolin e tyre për “Frozen Fever”, por ende nuk dihet nëse këta do të kthehen edhe në vazhdimin e pjesës së dytë të filmit “Frozen”.

Kompania Disney gjithashtu ka konfirmuar gjatë takimit me aksionarët se, Felicity Jones do të luaj në spinoffin e Star Warsit të titulluar Rogue One, i cili do të lansohet më 16 dhjetor të vitit 2016.

Gjithashtu kompania ka konfirmuar se Star Wars Episode VIII do të hapet më 26 maj të vitit 2017, me qëllim për të shënuar 40 vjetorin e franshizës. /Telegrafi/