Ngjyrë romantike e trëndafiltë

Është ngjyra pastel që i shkon të gjithave; është e rafinuar, ndriçon shikimi dhe mund ta zgjedhësh si për ditën ashtu edhe për mbrëmjen.

Përgatiti: Laura Dreshaj

Mbi fytyrë, një efekt natyral
Ngjyra e trëndafiltë, nga tonalitet më të ftohta tek ato më të ngrohtat, i shkon të gjithave, sepse ndriçon fytyrën. Zeshkanet duhet të përdorin më pak, kurse ato që e kanë ngjyrën e fytyrës më të çelët duhet të përdorin pak më shumë. Në veçanti, nëse keni fytyrë të zeshkët në të gjelbër, pudra i jep mollëzave dritë, por mbi faqe duhet ta shpërndani sa më lehtë. Pastaj, është e rëndësishme të mos përdorni rimel të zi, përndryshe sytë do të duken të skuqur.

Mos kini frikë ta teproni me sasinë, nëse në të kundërt e keni lëkurën e çelët dhe tiparet nordike. Në këtë rast, ju përshtaten të gjitha ngjyrat pastel, përfshirë natyrisht edhe të trëndafiltën. Madje mund të argëtoheni, duke luajtur me efektin e kukullës së porcelanit. Kjo do të thotë që mund ta kaloni disa herë hijezuesin dhe pudrën sipas rezultatit që kërkoni të arrini dhe të situatës: pak gjatë ditës, më shumë për në mbrëmje. Në ndryshim nga zeshkanet, mund të përdorni edhe rimelin.

Bëni kujdes vetëm me buzëkuqin: është gjëja më e vështirë për t’u zgjedhur, sepse, nuk bën të gaboni në tonalitet. Gjatë ditës përdorni një ngjyrë natyrale, ndërsa në mbrëmje buzëkuqtë e shkëlqyeshëm dhe me perla. Dhe nëse doni t’i përcaktoni më mirë konturet e buzëve, përdorni një laps, por të së njëjtës ngjyrë.

Flokët, krihini kështu: Nëse vitin që kaloi kishit balluke, mund ta kaloni atë në anë si të ishte një kordele, duke e fiksuar me karfica (në mbrëmje janë të përsosura ato me gurë të shkëlqyeshëm). Dhe nëse dëshironi t’i mblidhni prapa, mjafton të krijoni cullufe të vogla me duar dhe t’i fiksoni me karfica. Por mos mendoni se për të bërë këtë gjë nevojiten flokë të gjatë. Edhe nëse i keni flokët e shkurtër, mjafton të armatoseni me xhel dhe vetëm dy karfica për të krijuar efektin e viteve ’40: krihini nga njëra anë, fiksojini me xhel dhe vendoseni karficën prapa veshit. Së fundi, aplikoni pak xhel në majat e flokëve dhe kthejini nga prapa. /Telegrafi/