Finalizohet me sukses edicioni i dytë i festivalit ‘Reel Rock Tour Peja’

Ka përfunduar me sukses edicioni i dytë i festivalit të filmit për ngjitjen në shkëmbinj, Reel Rock Tour Peja. Festivali, i cili tanimë ka filluar rrugëtimin e sigurt për t’u shndërruar në një ngjarje tradicionale është organizuar nga organizata “Marimangat e Pejës”, e cila aktivitet kryesor ka ngjitjen dhe promovimin e bjeshkatarisë dhe turizmit në Pejë dhe më gjërë.

‘Reel Rock Tour’ është një ngjarje e iniciuar në SHBA dhe zhvillohet në më shumë se 400 lokacione anembanë globit, ku filmat që janë pjesë e programit shfaqen në të gjitha këto vende.

Përveç sponsorit kryesor dhe tradicional, Ambasadës Amerikane në Prishtinë, këtë vit festivali u mbështet edhe nga sponsorë të tjerë si Komuna e Pejës, Birra Peja, Buquku si dhe sponsorët medialë, Telegrafi dhe Klan Kosova.

Drejtoresha e festivalit, Flutura Ibrahimi, para sallës plot të kinemasë “Jusuf Gërvalla”në Pejë në fjalimin e saj hyrës u shpreh shumë e lumtur për interesimin e treguar në këtë edicion.

“Po më bëhet zemra mal kur po e shoh këtë sallë të kinemasë të mbushur plot, për më shumë kur pjesa më e madhe jeni alpinistë, bjeshkatarë, kolegë të mi, njerëz të mirë dhe dashamirës të natyrës. Faleminderit që keni gjetur kohë dhe na keni nderuar”, pohoi ibrahimi.

Karakteristikë e këtij edicioni ka qenë edhe prania e më shumë se 100 mysafirëve nga klubet e ndryshme të alpinizmit, ngjitjes dhe bjeshkatarisë nga vende të ndryshme të Kosovës dhe nga Shqipëria. Mysafirët kanë qenë nga Federata, Pashtrriku, Sharri, Klubi Alpin, Mariashi, Gjeravica, dhe shumë organizata të tjera. Të pranishëm në festivali ishin edhe një pjesë nga ekipi i Shqipërisë së Mount Everestit.

Në ditën e dytë, tanimë në formë tradicionale, festivali ka vazhduar më aktivitete të bjeshkatarisë si ngjitja në shkëmbinj, ecje malore, vizita në shpella dhe ngjitja në Via Ferrat Ari.

“Pjesën e festivalit që ka të bëjë me atraksione të bjeshkatarisë në vitin e ardhshëm dhe vitet që pasojnë do ta zhvillojmë edhe më shumë. Do të ketë më shumë atraksione e po ashtu do të jenë të organizuara për më shumë mysafirë. E tërë kjo pasi që interesimi i mysafirëve është në rritje të vazhdueshme për këto atraksione”, ka deklaruar kryetari i organizatës “Marimangat e Pejës”, Nol Krasniqi.

Këtë vit në kuadër të festivalit filmat janë shfaqur edhe në Zubin Potok, ku ka pasur edhe aktivitete të tjera. Për më shumë informata rreth festivalit dhe filmave të shfaqur në këtë edicion mund të informoheni në www.reelrocktour.com.