Është mbyllur Shpella e Gadimes

Nga e hëna është mbyllur Shpella e Gadimes. Kjo, pas vendimit të Ministrisë së Mjedisit dhe Planifikimit Hapësinor për mbylljen dhe ndalimin e të gjitha aktiviteteve në Monumentin e Natyrës me Rëndësi të Veçantë, Shpellës së Gadimes, në Komunën e Lipjanit, për një afat kohor. Arsyetimi: dëmi i madh që po i bëhet asaj.

Kreshnik Berisha, këshilltar në Ministrinë e Mjedisit dhe Planifikimit Hapësinor, ka thënë se për shkak të gjendjes në të cilën është shpella, kjo ministri është detyruar të marrë vendimin e mbylljes së Shpellës së Gadimes, meqë shkatërrimi i saj është bërë i madh.

“Gjendja përreth shpellës, në kodrën e Murturit, në të cilën është krijuar ajo nuk është e mirë, në pjesën veriperëndimore të saj janë konstatuar dukuritë e gërryerjes së materialit shkëmbor nga reshjet”, ka thënë Berisha për “Zërin”, duke treguar se në këtë vend turistik kanë ndodhur edhe veprimtari të ndaluara.

“Në Shpellën e Gadimes janë ushtruar veprimtari të palejuara që rrezikonin karakteristikat dhe vlerat e kësaj pasurie kombëtare. Mbyllja e përkohshme u vendos si masë e përgjithshme për mbrojtjen e monumentit”, ka thënë Berisha.

Berisha më tej ka treguar për dëme që ka pësuar kjo pasuri natyrore, siç janë çarjet e mëdha në zonën tektonike në hyrje dhe në fillim të kanalit të Galerisë së Lotëve, një tjetër rrezik që kërcënon atë është rreziku i shembjes dhe rënies së copave të shkëmbinjve në korridoret që frekuentohen nga vizitorët.

“Në shpellë është konstatuar, në përmasa shqetësuese, paraqitja e myshqeve dhe zverdhja e stolive speleologjike gjë që do të ketë ndikime serioze në proceset e zhvillimit të mëtejmë të shpellës”, ka thënë Berisha, duke numëruar edhe një sërë probleme të tjera që lidhen me Shpellën e Gadimes, ndër to, thyerjet që i janë bërë, larja mekanike e stolive, gjë që zvogëlon vlerën e shpellës.

Ndriçimi joadekuat, punimet ilegale dhe menaxhimi i shpellës pa kritere profesionale dhe shkencore, sipas Berishës, janë disa probleme të tjera me të cilat ballafaqohet ky monument.

“Është brengosëse edhe dukuria e mbishkrimeve dhe grafiteve të ndryshme që hasen kudo nëpër korridoret e shpellës, dukuri kjo që në masë të madhe e dëmton imazhin dhe origjinalitetin e këtij monumenti natyror”, ka thënë më tej këshilltari i ministrit, Dardan Gashi. Ai më tej për gazetën ka thënë se pavarësisht përpjekjeve të deritanishme të institucioneve për të menaxhuar këtë pasuri kombëtare, kjo nuk ka ndodhur, për shkak të pretendimeve autoriale.

“Tashti pas implementimit të vendimit; mbylljes së përkohshme të Shpellës, do të krijohet Drejtoria e cila dhe do të merret me menaxhimin e saj. Buxheti veçse është ndarë dhe presim që në një të ardhme të afërt Shpella e Gadimes t’i kthehet jetës dhe përkujdesjes shtetërore”, ka përfunduar Kreshnik Berisha.

Fillojeta Konjuhi, nga iniciativa “Save the Cave”, ka shprehur se e kanë mirëpritur vendimin e ministrisë pasi që është e domosdoshme të intervenohet në të.

“Ne kemi pasur takim me zëvendës ministri i Ambientit Shpëtim Rudi, gjatë kampanjës, edhe na ka premtuar që në një të ardhme të afërt do të marrin masa, siç duket ato filluan”, ka thënë Konjushi, duke shtuar se shpresojnë që do të bëhen ligje adekuate që do të mbrojnë Shpellën e Gadimes. /Zëri/