Jahjaga mori pjesë në hapjen zyrtare të DokuFest

Presidentja e Republikës së Kosovës, Atifete Jahjaga, mori pjesë në hapjen zyrtare të Festivalit të 12-të ndërkombëtar të filmit dokumentar, “DokuFest”, në Prizren.

Me këtë rast presidentja tha se është kënaqësi e veçantë pjesëmarrja në një ngjarje të veçantë të kulturës, siç është ky festival i filmit dokumentar.

“Është një kënaqësi e veçantë që të jemi këtu në qytetin e bukur të Prizrenit, në një ngjarje të veçantë siç është DokuFest, që mbledh një numër shumë të madh të artdashësve, njerëz të fushës së artit dhe të kulturës nga shumë vende të tjera të botës dhe që vendos jo vetëm Prizrenin, por edhe Kosovën rreth qendrave të tjera të artit dhe të kulturës”.

“U dëshiroj sukses të madh të gjithë organizatorëve, qytetarëve të Prizrenit dhe gjithë qytetarëve të Kosovës që këtë javë ta kalojnë sa më mirë që është e mundur dhe të gjithë këtyre artdashësve t’ju ofrojmë gjithë atë që kemi ne si kulturë dhe si pjesë të artit të vendit tonë”, deklaroi Jahjaga. /Telegrafi/