Krasniqi uron FPK për pranim në Konfederatën Botërore

Ministri i Kulturës, Rinisë dhe Sportit (MKRS), Memli Krasniqi të hënën ka pritur në një takim drejtuesit e Federatës së Peshkatarëve të Kosovës (FPK), pas pranimit të tyre në Konfederatën Botërore të Peshkimit Sportiv C.I.P.S.

I pari i sportit të vendit tonë, uroi FPK-n ata për punën e deritanishme në promovimin e peshkatarisë që prek shumë dimensione.

Ministri Krasniqi tha se është e rëndësishme që kësaj federate i janë hapur dyert për aktivitete ndërkombëtare dhe për këtë çmoi punën e drejtuesve të federatave. Ai po ashtu e vlerësoi si mjaftë shembullore angazhimin e federatës në organizim të brendshëm dhe përpjekjeve për masivizim të peshkatarisë në aspektin sportiv. Ministri Krasniqi tha se, “siç ka ndodhur edhe në të kaluarën, edhe në të ardhmen MKRS-ja do të mbështesë këtë federatë në aktivitete nacionale dhe prezantim ndërkombëtar”.

Ndërkohë, kryetari i Federatës së Peshkatarëve, Arianit Sllamniku falënderoi ministrin për përkrahjen e vazhdueshme. Ai ka folur për aktivitetet që kanë zhvilluar deri tash dhe ka njoftuar për planet që kanë në të ardhmen. Sllamniku theksoi se është inkurajuese që kanë një përkrahje nga shteti në çdo nismë të tyre. /KP/Telegrafi/