Më në fund ia nis edhe Hysi

Skuadra e Hysit është e fundit që ka nisur përgatitjet për stinorin pranveror të Raiffeisen Superligës së Kosovës në futboll. Stërvitjen e parë, futbollistët e Hysit e zhvilluan të martën, transmeton Koha.net. Trajneri i Hysit, Fadil Ademi, ka thënë se përgatitjet po fillojnë me vonesë, por e rëndësishme, sipas tij, është që ato tashmë kanë filluar. Ai ka thënë se me përjashtim të pesë futbollistëve, të tjerët ishin të pranishëm në stërvitjen e parë.

"Lojtarët që munguan kishin arsye, kurse të tjerët iu përgjigjën pozitivisht ftesës. Jemi me vonesë, por me aq sa pashë unë, futbollistët nuk e kishin humbur energjinë. Dukej që ata kishin punuar dhe nuk ishin ndalur. Kjo stafit ia lehtëson punën për vazhdimin e përgatitjeve. Gjatë kësaj jave do të stërvitemi me këtë intensitet, një herë në ditë, por javën e ardhshme nëse gjejmë lokacionin për stërvitje dhe besoj se do të na ofrohen kushte ku do të ushtrojmë dy herë në ditë. Nga kryesia kemi fjalë të mira që përgatitjet e fundit mund t’i zhvillojmë në Ulqin", ka thënë Ademi për “Kohën Ditore”.

Hysi pjesën vjeshtore e përfundoi në pozitën e tretë me 28 pikë, sa ka edhe Ferizaj që është një pozitë më lartë. Skuadrës së Hysit i është larguar vetëm mbrojtësi Ahmet Haliti që kaloi te skuadra e Besës së Kavajës. "Edhe pse Mentor Zhdrella e ka dorën të thyer, ishte i pranishëm në stërvitje", ka shtuar Ademi. /Koha/Telegrafi/