Arsim Thaçi sikur Alex Ferguson

Siç dihet, trajnerët kosovarë qëndrojnë sikur me ‘këmbë mbi prush’ nëpër klubet e futbollit. Këto të fundit vazhdimisht janë shumë të pasigurta për trajnerë, të cilët mund të shkarkohen në çdo moment. Madje, ky fenomen qëndron edhe në klubet më të mëdha të Superligës, tek të cilat aspak dhe asnjëherë nuk ndihen komod trajnerët.

Megjithëkëtë, nuk janë të gjitha klubet njësoj. Të paktën në 2 Korrik ky fenomen nuk ekziston, çka e bënë akoma më të veçantë këtë klub, i cili unifikohet edhe me disa karakteristika tjera. 2 Korriku është njëri prej klubeve që ofron më së shumti rehati e siguri për trajnerë.

Derisa në klubet tjera trajnerët nuk kanë mundësi të punojnë më shumë sesa gjashtë muaj eventualisht një vit, në klubin prishtinas trajneri mund të ndihet i sigurt gati me një dekadë. Këtë e konfirmon fakti se Arsim Thaçi vazhdon të qëndrojë në postin e shefit të shtabit teknik të 2 Korrikut qe nëntë vjet, saktësisht nga viti 2005.

Kështu, ai sikur po e ndjek rrugën e Alex Fergusonit, i cili me dekada ishte i paprekshëm dhe i pazëvendësueshëm në Manchester United, të cilën skuadër e kishte udhëheq për 27 vjet. /Tribuna/Telegrafi/