Sigal Prishtina nuk është fontanë dëshirash, thotë Miftari

Viti të cilin tashmë e lamë pas ishte tejet i suksesshëm për skuadrën më të trofeshme në basketbollin kosovar, Sigal Prishtinën, të cilën edhe gjatë këtij viti e presin sfida të mëdha si në rrafshin vendor ashtu edhe në atë ndërkombëtar.

“Ndonëse kishte përpjekje që të na destabilizojnë, këtë nuk e arritën dhe ne gjatë tërë vitit kemi treguar stabilitet dhe qëndrueshmërinë e cila bëri që viti 2013 të përmbyllet me shumë sukses, madje më shumë sesa kemi pritur. Kjo për faktin se në Ligën Ballkanike qëndrojmë shumë mirë dhe 5 fitore nga 7 ndeshje janë barometër më i mirë se për çfarë cilësie bëhet fjalë.

Edhe palestra e sporteve tashmë ka pamje të re, madje do të ketë edhe surpriza tjera të cilat tash për tash nuk dua t’i përmend ”, theksoi drejtori i Sigal Prishtinës Florian Miftari, sipas të cilit “ asgjë negative nuk kishte në vitin 2013 pasi ne punonim dhe nuk kishim kohë të merreshim me punët negative, ne mendojmë vetëm pozitivisht”.

Ai falënderon të gjitha ata që e përkrahën skuadrën e veçmas adhuruesit e shumtë. “Falënderim i veçantë shkon për plisat të cilët na përkrahën në çdo hap dhe janë pjesë e sukseseve tonë, ndërkohë që edhe sponsorët ishin ndihmesë e madhe për ne, pa të cilën nuk do të ishim aty ku jemi”, shprehet Miftari, duke bërë me dije se skuadra pritet të paraqitet në përbërjen e njëjtë edhe në garat që nisin me 15 janar me ndeshjen e Ligës Ballkanike kundër Levskit në Sofje të Bullgarisë.

“Jemi të kënaqur me përbërjen që e kemi dhe nuk pres ndryshime, kuptohet nëse nuk do të ketë lëndime të cilat na detyrojnë për një gjë të tillë. Kuptohet se shumëçka varet edhe nga rivalët në Ligën Ballkanike, të cilët gjithsesi do të përforcohen, kështu që mbetet të shihet. Kjo nuk e përjashton mundësinë që edhe të angazhojmë ndonjë basketbollist cilësor”, thotë drejtori i Sigal Prishtinës.

Ditëve të fundit kishte shumë spekulime rreth kthimit të mundshëm të Samir Shaptahoviqit në radhët e Sigal Prishtinës, por kjo tash për tash mbetet vetëm dëshirë e dikujt. “Sigal Prishtina nuk është fontanë dëshirash. Të gjithë duan të luajnë në këtë skuadër, pasi është model më i mirë për të tjerët, por kjo nuk do të thotë se ne i pranojmë. Ata që duan të luajnë këtu duhet t’i plotësojnë disa kritere”, tha Miftari, duke bërë me dije se “ ne nuk i kontaktojmë basketbollistët të cilët kanë kontrata me klube”.

Duket se puna me grupmosha do të jetë ndër prioritetet e Sigal Prishtinës në vitin 2014. “ Shkolla e Basketbollit do të rikonstruohet dhe do të mundohemi që t’i shfrytëzojmë edhe palestrat tjera në qytet në mënyrë që fëmijët nga çdo lagje ta kenë më afër palestrën për ushtrime. Do t’i kushtojmë rëndësi të madhe grupmoshave të reja në mënyrë që sa më shumë basketbollistë të rinj të kalojnë në skuadrën e parë të Sigal Prishtinës.

Viti 2014 fillon me një pilot projekt ku parashihet edhe hapja e dy pikave shitëse të rekuizitave të klubit, ashtu siç bëjnë klubet e mëdha kudo në Evropë”, tha Shkelzen Fetiu.

Sigal Prishtina në ETC Superligën e Kosovës pas pjesës vjeshtore ndan vendin e parë me Pejën, kurse në Ligën ballkanike renditet në pozitën e dytë, por me një ndeshje më pak se Kumanova e cila është në vendin e parë. /Zëri/Telegrafi/