Kosova ende pa teste të dopingut

Të gjithë zyrtarët e sportit kosovar, krerët e federatave dhe komitetit olimpik janë me gojën plot anëtarësim në instancat ndërkombëtare sportive.

Por, me gjithë punën “intensive” të tyre, realiteti tregohet ndryshe. Po kalon edhe viti 2013, derisa Kosova ende nuk ka testin anti-doping, një standard i cili kërkohet nga të gjitha federatat dhe komitetet ndërkombëtare, ndërkohë që agjencitë ndërkombëtare për luftimin e kësaj të keqe të sportit dita ditës po i shtrëngojnë kriteret e testeve të dopingut.

Deri më tash kjo gjë është zvarritur tej mase, ndërsa sipas Besim Hasanit, kryetar i Komitetit Olimpik të Kosovës, viti 2014 do të jetë koha kur Kosova do të realizojë për herë të parë testet anti-doping për sportistët e saj. Ai thotë se ndryshimet e bëra në ligjin për sportin kanë ndihmuar që një gjë e tillë të realizohet në një periudhë jo të largët.

“Doping-testi është një standard që duhet të arrihet për të qenë pjesë edhe e Komitetit Olimpik Ndërkombëtar por edhe federatave të ndryshme ndërkombëtare, prandaj është e rëndësishme që sa më parë ta realizojmë këtë. Sipas ndryshimeve në Ligjin për Sportin, parashikohet të formohet një agjenci për doping-teste. Iniciativën duhet ta dërgojmë në Kuvendin e Kosovës, pasi që vetëm ai mund të themelojë agjenci të tilla. Besoj se procedura e formimit të kësaj agjencie do të kryhet brenda gjashtëmujorit të parë të vitit 2014, dhe si rezultat gjatë vitit të ardhshëm do të kemi edhe testin anti-doping”, ka thënë Hasani.

Ai po ashtu ka thënë se për t’u realizuar një gjë e tillë duhet që Kosova të arrijë marrëveshje me ndonjërin nga shtetet që posedojnë laboratorë për kryerjen e këtyre testeve. “Për të realizuar testet anti-doping nevojitet laborator i veçantë të cilin Kosova nuk e ka. Prandaj, Kosova do të duhet të lidhë marrëveshje me ndonjë shtet i cili posedon laborator të tillë dhe në rajonin tonë shtetet më të afërta janë Italia dhe Greqia”, ka shtuar i pari i olimpistëve të Kosovës.

Në anën tjetër, trajneri i futbollit, Arbnor Morina, ka theksuar se ky test është i domosdoshëm për depërtim në arenën ndërkombëtare.

“Testi anti-doping është shumë i rëndësishëm në çdo garë dhe shumë shpejt edhe për sportistët tanë do të jetë i obligueshëm. Personalisht nuk e di a ka ndonjë rast të përdorimit të substancave të ndaluara tek sportistët tanë pasi që disa medikamente janë të lejuara në masë të caktuar dhe në përkujdesje të mjekut. Madje mendoj se klubet do të duhet të jenë të kujdesshme dhe të shpenzojnë më shumë në substanca të tilla të lejueshme të cilat i ndihmojnë sportistët në rigjenerimin e energjisë së humbur sidomos gjatë fazës përgatitore e cila është mjaft e mundimshme”, ka thënë Morina.

Megjithatë se a përdorin substanca të tilla sportistët kosovarë apo jo, është e vështirë të vërtetohet në mungesë të një testi të tillë. Sipas Emin Baliqit, futbollist aktiv, përdorimi i preparateve të tilla është financiarisht i kushtueshëm dhe është pak e besueshme që sportistët kosovarë përdorin substanca të tilla.

“Mendoj se mungesa e testit të dopingut nuk është më e rëndësishmja pasi që në sportet tona mungojnë edhe shumë gjëra të tjera duke filluar qysh prej infrastrukturës elementare. Përdorimi i substancave të tilla, është i dëmshëm për shëndetin e njeriut. Po ashtu substancat e tilla janë mjaft të kushtueshme dhe duke pasur parasysh gjendjen ekonomike te ne është pak e besueshme që sportistët të shpenzojnë në medikamente të tilla. Mua personalisht nuk më ka shkuar kurrë ndërmend që të përdor substanca të tilla pasi që para së gjithash i frikësohem Zotit”, ka thënë Baliqi. /Zëri/Telegrafi/