Triumf i mundimshëm për “minatorët”

Trepça ka arritur të arkëtojë tre pikë të mundimshme nga takimi me Ferronikelin në terren të vet, në kuadër të javës së 12-të të Superligës së Kosovës. Fitoren minimale 1:0 ekipit mitrovicas ia ka dhënë Labinot Jetullahu në minutën e fundit të ndeshjes.

"Minatorët" kanë dominuar tërë lojën, por me mjaft vështirësi arritën te goli i fitores. Në anën tjetër mysafirët që kishin udhëtuar me mungesa, qëllim patën daljen si të pamposhtur nga ky duel, duke u mbrojtur me të gjitha forcat. A

rbitri Besfort Kosumi ka treguar tre kartonë të kuq, por ka përjashtuar vetëm dy futbollistë, Elvis Osmanin e Trepçës dhe Astrit Thaqin e Ferronikelit. "E kemi parashikuar se do ta kemi të vështirë. Kemi udhëtuar pa katër futbollistë titullarë, u munduam të mbrohemi gjatë gjithë lojës, ky është koncepti im i lojës. Nuk e arsyetoi gjykimin dhe përjashtimin e futbollistit tonë.

Pavarësisht dominimit të Trepçës mendoj se kemi merituar një pikë" tha trajneri i Ferronikelit, Ramiz Krasniqi. Vendësit kanë pasur më shumë raste për të arritur tek goli, ndërkohë që udhëtuesit në përjashtim të dy goditjeve nga largësia dhe një rast të bllokimit të gjuajtjes së Karahodës, nuk kanë bërë asgjë më shumë. Në minutën 11’ Babaj gjuan Kolshi me shumë problem dëbon topin jashtë fushës. Në minutën 20’ Ademi nuk harkon, e as nuk godet nga pozita e volitshme.

Në minutën 36’ Kasapi ka gjuajtur nga largësi mbi 20 metra Kolshi për pak befasohet, por reagon instinktivisht dhe mohon golin. Në minutën 75’ arbitri Kosumi i tregon kartonin e kuq dikujt në një tollovi, por pas konsultimit me arbitrin e katërt e vazhdoi lojën sikurse nuk ka ndodhur asgjë. Në minutën 79’ në një kundërzbritje Berisha shërben Karahodën e ky gjuan por bllokohet nga Izmaku.

Në minutën 82’ vendasit kërkuan penallti me pretekst se një mbrojtës mysafirë luajti me dorë brenda zonës, por bylbyli i arbitrit mbeti i qetë. Pak më vonë Thaqi zverdhet për herë të dytë dhe përjashtohet, e në aksionin vijues anulohet një gol i vendasve, me ç’rast Osmani reagoi dhe për këtë u shpërblye me karton të kuq.

Vuajtjet e vendasve i ndali Jetullahu në minutën e 90’, duke shndërruar në gol një asistim të Ademit. Goli shkaktoi tollovi në terren, pasi që solli duele verbale ndërmjet lojtarëve , por edhe zyrtarëve të të dyja klubeve. "Patëm punë me një skuadër që u mbrojt 90 minuta, mezi depërtuam për të shënuar gol.

Mendoj se duhet të luajmë lojë të hapur dhe burrërore, e jo të mbrohemi. Unë po aplikoj lojë të hapur për publik. Patëm edhe gabime që duhet të evitojmë dhe besoj se nga loja në lojë do përmirësohemi", tha trajneri i Trepçës’89, Fahredin Duraku. /Zëri/Telegrafi/