Prishtina bindëse ndaj Kosovës së Munihut

Prishtina ka fituar Kupën mbarëkombëtare, pasi që në finale e ka mposhtur skuadrën shqiptare nga Gjermania, Kosovën e Munihut me rezultat të thellë 8:1. Prishtina në këtë takim ndonëse hyri me ekip të kombinuar ku në përbërjen e parë trajneri Afrim Tovërlani kishte angazhuar disa futbollistë të rinj, dominoi plotësisht në fushë, çka edhe ishte normale, kur dihet se mysafirët nga Gjermania nuk janë të një rangu të lartë dhe se futbollin e kanë vetëm hobi.

”Për ne është nder të luajmë me ekipin e Prishtinës. Këta futbollistë këtë e kanë punë, ndërsa për ne hobi. Gjithsesi jam i lumtur që isha sot këtu. Sa i përket ndeshjes në kemi punuar shumë dhe kemi ardhur për të fituar, por u pa që këta janë shumë më të fortë, shumë më të organizuar dhe me cilësorë”, tha futbollisti i Kosovës së Munihut, Fidan Mamaj.

Prishtina mirë e nisi takimin derisa iu kanë dashur vetëm 2 minuta për të ardhur te goli i parë, ishte Flamur Shala ai që hapi serinë e golave për Prishtinën. Në listën e realizatorëve për Prishtinën u shënuan edhe Berat Hyseni, Shend Kelmendi e Lorik Aliu që shënuan nga dy gola, ndërsa një e shënoi edhe mesfushori Qëndrim Jahjaj. Të vetmin gol për mysafirët nga Gjermania e shënoi Ylber Sahiti në minutën e fundit të ndeshjes.

“Ishte një ndeshe interesante për ne. Prishtina në çdo takim hyn me seriozitet në fushë edhe ne sot hymë për të dhënë më të mirën, por u pa që kundërshtari nuk ishte në nivelin tonë”, tha sulmuesi Berat Hyseni, që duket se tashmë ka hyrë në formën më të mirë të tij.

Për Prishtinën luajtën: Mushica, Thaçi, Gashi, Haxhaj, Miftari, Ahmeti, Jahaj, Aliu, Hyseni, Kelmendi dhe Shala. U aktivizuan edhe: Muqiçi, Llumnica, Begolli, Gent. Begolli, Krasniqi, Berisha, Kuka e Pira. Për Kosovën luajtën: Begisholli, Krasniqi, Mamaj, Salihaj, Neqka, Sherifi, Muji, Dragidella, Muji, Shala dhe Zeqiri. U aktivizuan: Sahiti, Ramadani, Salihi, Mehmeti, Gashi e Kirberi. /Zëri/Telegrafi/