Ekipet e Ligës Ballkanike, vështirë të fitojnë në Pejë

Art Gashi është president i njërës prej skuadrave debutuese të Ligës Ballkanike. Ekipi i tij do të luajë për her të parë në këtë kompeticion kontinental, pasi e fitoi titullin e kampionit të Kosovës, në sezonin e fundit.

Kryetari i verdh e zinjve ka folur për uebfaqen zyrtare të Ligës Ballkanike rreth pjesëmarrjes së ekipit pejan në këtë garë. Më poshtë mund ta lexoni deklaratën e plotë të Gashit:

“Për ekipin tonë dhe për të gjithë basketbollin e Kosovës, ky është një sezon historik, sepse për herë të parë do t’i kemi dy skuadra duke luajtur në gara ndërkombëtare. Ne e respektojmë shumë Ligën Ballkanike dhe kemi bërë shumë mund për t’iu bashkuar asaj. Mendoj se rasti erdhi këtë vit. Do të mundohemi ta bëjmë më të mirën tonë. Për ne, është mjaft e rëndësishme ta kemi një ekip kualitativ, por ajo që është më e rëndësishme është se kualiteti është organizimi i klubit dhe t’i organizojmë dhe t’i përgatisim sa më mirë ndeshjet, për ne dhe për njerëzit që do të na shohin në televizor.

Mendoj se është mundësia e fundit që Kosova t’i tregojë Evropës dhe tërë botës se e meritojmë të luajmë për një kohë të gjatë, por situata politike nuk na le ta bëjmë këtë. Ne e falënderojmë shumë Ligën Ballkanike dhe zotërinë Shtriks që na dha mundësinë që të tregojmë se Kosova mund të luajë basketboll.

Peja është njëri prej qyteteve më të mëdhenj në Kosovë dhe njëri prej më të famshmëve për bazën e tifozëve të zjarrtë. Që kur jemi themeluar si klub, gjithmonë kemi luftuar për titull dhe për trofe. Sezonin e kaluar ishim kampionë të Kosovës dhe kishim një ekip mjaft kualitativ. Pasi po marrim pjesë në Ligën Ballkanike këtë sezon, ne po shkojmë duke u përmirësuar dhe duke u zhvilluar, për të mirën e klubit dhe të ekipit.

Trajneri ynë Daniel Lutz është njëri prej më të mirëve në rajon. Sezonin e kaluar ai e ka fituar titullin dhe kupën me Cibona Zagreb, njëri prej klubeve më të mëdhenj në rajon. Ai erdhi në Pejë që ta zhvillojë një projekt afatgjatë me ne. Siç e thash, është e rëndësishme që ta kemi një ekip cilësor, por ajo që është më e rëndësishme është që ta kemi një klub të organizuar dhe zotëri Lutz mund të na ndihmojë neve në këtë rrugë.

Ne kemi angazhuar tre lojtarë të huaj. Njëri nga ta është Frederick House, i cili është i njohur në rajon. Ai kishte luajtur për Partizanin për dy sezone dhe ishte njëri prej më të mirëve atje. Më pas, ai ka luajtur edhe në klube të famshme si Lietuvos Rytas, Tau Ceramica, Pamesa dhe shumë të tjerë. Ai erdhi për të luajtur për Pejën në momentin kur i thamë se do të luajmë në një kompeticion ndërkombëtar si Liga Ballkanike dhe ai dëshiron ta japë kontributin e tij në këtë eveniment.

Ne e angazhuam po ashtu Vedran Morovicin, i cili ka luajtur në Zadar dhe për ekipin kombëtar të Kroacisë. Ai është mjaft lojtar i mirë dhe mendoj se do ta japë kontributin në Ligën Ballkanike. Ne e angazhuam po ashtu lojtarin George Odufuwa, i cili ishte bashkëlojtar i Fred House në ligën zhvilluese në SHBA. Ai është lojtar i ri, ka luajtur në Ukrainë dhe nuk ka eksperiencë të madhe në Evropë, por mendoj se ai do të mësohet në basketbollin tonë.

Në momentin që kemi hyrë në këtë kompeticion, unë vërtetë doja t’ju vërtetoja se kemi ekip cilësor dhe se duam të qëndrojmë sa më gjatë që mundemi në këtë ligë. Të luajmë në Ligën Ballkanike ne duhet të jemi të suksesshëm në ligën vendore, kështu që do të luftojmë në të dyja frontet. Në Kosovë mendoj se do të luftojmë për të dy trofetë këtë sezon – titullin dhe kupën.

Nuk mund të them asgjë për Ligën Ballkanike sepse ende nuk i njoh ekipet tjera. Ne jemi pa eksperiencë në Evropë, por kjo nuk do të thotë se nuk mund të befasojmë. Mund t’ju premtoj se çdo ekip që do të vjen në Pejë, do të jetë i mirëseardhur, por do ta ketë mjaft të vështirë të na mposht. Ne jemi mjaft të fortë në shtëpi.

Ekipi ynë do të zhvillohet në aspektin e organizimit. Ne jemi duke e ndërtuar një akademi të re të basketbollit, për t’i rritur lojtarët e rinj, sepse Peja ka shumë talente. Besoj se pas disa vitesh, Peja do të jetë qendër e basketbollit në Kosovë dhe nuk do t’i zhvillojë vetëm lojtarët e këtij qyteti, por edhe nga e tërë Kosova.

Them se pas disa vitesh do të kemi më shumë lojtarë vendorë që do të jenë të rëndësishëm për klubin tonë, në nivelin kombëtar dhe ndërkombëtar. Siç e thashë, ekipet tjera do të mirëpriten në qytet, por do ta kenë të vështirë kur të lozin me ne. Kemi ekip të fortë dhe kualitativ dhe ata do të na njohin neve shumë shpejt”. /Express/Telegrafi/