Prishtina pëson dy humbje, nesër ndeshet me Arsenalin

Ekipi i kryeqytetit, FC Prishtina, nuk ia ka dalë të kualifikohet në gjysmëfinale të turneut ndërkombëtar “RUHR Cup 2013” për grupmoshat U19, pasi është mposhtur sot nga Borussia Moenchengladbach dhe Zenit St. Petersburg.

Bardhekaltërit, pas paraqitjeve të mira në ditën e parë të turneut, kur fituan një ndeshje dhe në tjetrën barazuan, në ditën e dytë kanë pësuar dy humbje të njëpasnjëshme dhe kështu lëshuan rastin që të mbeten në pozitën e dytë të Grupit B dhe futen në mesin e katër ekipeve më të mira të turneut, raporton Zëri.

Prishtina në ditën e dytë ndeshjen e parë e ka humbur ndaj Borussia Moenchengladbach me rezultat 1:0, ndërsa të dytën nga Zenit St Petersburg 3:0, i cili edhe është fitues i grupit me 10 pikë të grumbulluara. I dyti në Grupin B ka përfunduar Wolfsburgu.

Në Grupin A, Valencia bindshëm është radhitur në pozitën e parë, ndërkohë që në pozitën e dytë dhe një vend në gjysmëfinale e ka siguruar ekipi përfaqësues i Kinës U-19, që njëherësh është edhe befasia e këtij turneu, duke lënë prapa edhe ekipet si Borussia Dortmund, Arsenal dhe Hamburg.

Megjithatë, ekipi prishtinas do të ketë rastin t’i masë forcat me të rinjtë e Arsenalit për vendin e 5-të në këtë turne, pasi që të dy klubet kanë përfunduar në pozitat e treta. /Telegrafi/