I bën 130 vjet pa ilaçe e ëmbëlsira

Në Kazakistan është gjetur një grua e cila besohet të jetë më e vjetra në botë. Emrin e ka Sahan Dosova, derisa ka lindur më 27 mars të vitit 1879. Kjo nënkupton se kjo grua së shpejti do të mbush 130 vjet jetë.

Gazetat ruse shkruajnë se Dosova është zbuluar rastësisht gjatë regjistrimit të atjeshëm të popullsisë, se jeton me nipin e saj 42-vjeçar, dhe se fëmijën e fundit prej 10 sa kishte gjithsej e kishte lindur në moshën 64 vjeçare. Ka tetë nipër, 12 stërnipër dhe 24 stër-stërnipër.

E pyetur se ku është fshehtësia e jetëgjatësisë së saj, plaka është përgjigjur: "Nuk kam ndonjë lloj fshehtësie. Thjesht, kurrë nuk kam pirë ilaçe, e kur sëmuresha, atëherë shërohesha me mjekësi popullore. Tërë jetën e kam agjëruar Ramazanin. Kam qenë e kujdesshme me ëmbëlsira, por e dua djathin e freskët, grurin…"

I vetmi problem që e mundon të moshuarën Dosova është dëgjimi. Ajo ka treguar se për herë të parë është martuar në moshën 18 vjeçare, dhe se si i ka varrosur të dy bashkëshortët e saj. I pari kishte vdekur në Stalingrad, derisa i dyti në vitin 1954.

Plaka gazmore ka porositur se njerëzit duhet t’i gëzohen jetës dhe se vallëzimi e bisedat me njerëzit që i kemi për zemër janë ilaçet më të mira.