Autobusët me parulla ateiste mbulojnë Britaninë

Autobusët në Britani të Madhe kanë filluar të marrin kahje ateiste. Kjo pasi që janë pikërisht ateistët ata të cilët sponsorizojnë një fushatë promovuese.

Tashmë në afishet e autobusëve në mbarë vendin mund të lexosh se “Zoti nuk ekziston” dhe se “nuk duhet patur frikë nga zemërimi i perëndisë”.

Parulla zyrtare është “Me gjasë nuk ka fare Zot. Mjaft u brengosët, filloni të shijoni jetën”. Janë 200 autobusë në Londër e 600 të tjerë në Angli, Skoci e Uells të cilët bartin parulla të tilla të cilat u mundësuan falë mbledhjes së fondeve me vlerë rreth 150.000 euro.

Të hollat do të përdoren dhe për sponsorizimin e rreth njëmijë reklamave të cilat do të vendosën në metronë e Londrës.

Iniciativa unike e llojit të vet bart emra të njohur të jetës britanike si dramaturgen Ariane Sherine apo profesorin e ateizmit Richard Dawkins.

Autobusët që kundërshtojnë ekzistencën e Zotit nuk do të mungojnë në qytete të tjera të mëdha si Manchester, Birmingham, Glasgow, Edinburgh, e Liverpool.

Fushata pritet të zgjasë për katër javë rresht. Ndërsa sloganet që do të mbushin metronë e kryeqytetit britanik do të përmbajnë thënie nga njerëz të shquar si Douglas Adams, Albert Einstein e Katharine Hepburn.